Esti sábadu 18 de xineru a les 17h, LABoral Centru d’Arte y Creación Industrial zarra la esposición protagonizada pol universu del axitador folclóricu Rodrigo Cuevas cola folixa El parlamento de les célebres, na que va haber baille. música y talleres. Amás, van presentase dellos resultaos del procesu d’investigación participativa a partir de les aportaciones al Archivo Célebre, ún de los elementos de la iniciativa.
«Esta esposición nun canoniza nin ensalza la figura de Cuevas; busca más bien xugar con ella, usala pa recomponer el nuestru propiu cuerpu: facer de la so sensibilidá un prisma, un mediu del que partir pa poner en marcha una investigación artística de calter participativu», desplicaben dende LABoral sobre esta amuesa qu’afonda en «dalgunes de les sos práctiques, saberes informales que l’artista cultiva como parte del so llabor creativu, y que son tamién clave nes sos acciones de vitalismu vecinal». «Nesti procesu, centrámonos en so «gracia«, entendida como un poder popular alegre y contaxosu, capaz de descolonizar les tradiciones», añaden.
D’esta manera, la esposición comisariada pol artista multidisciplinar Ricardo Villoria y el musicólogu Llorián García y con diseñu gráficu de Sergio Llunik, recueye dellos elementos que conviden «a la diversión y al xuegu: cantares, dichos, histories contaes con gracia…». Un «esperimentu» con filosofía colectiva como foi tamién la #RomeríaEnLABoral que la inauguró y la folixa que va zarrala esti sábadu.
Suscríbite a les nuestres novedaes
