José Ángel Hevia sigue cola xira de presentación del discu Platinum Europe Award. 25 Aniversario, l’álbum compilatoriu col que celebra que va 25 años llegó a vender n’Europa 1.750.000 copies del so discu Tierra de Nadie. Tres del conciertu especial que dio na Semanona de Xixón, el gaiteru maliayu aporta esti sábadu al Teatru Compoamor d’Uviéu, nun espectáculu nel que va tar acompañáu por nomes mui destacaos de la música’l país.
A les 20h va entamar esti conciertu -pal que se pueden mercar les entraes per internet- nel que van collaborar les cantantes Marisa Valle Roso y Mariluz Cristóbal Caunedo; los bailladores Pau Santirso y Maite Rozada; el músicu y compositor Ramón Prada; y les bandes de gaites Candás y Ciudad de Oviedo. Dende fuera d’Asturies aporten tamién el vocalista cántabru Nando Agüeros y l’artista cubana Liuba María Hevia. Un cartelu bien completu pa que rellume’l conciertu qu’Hevia va dar nun espaciu tan icónicu como’l Campoamor dientro d’una xira que yá tien confirmaes feches per teatros de Valladolid, Ávila, Palencia, Toledo y Madrid.
L’álbum nuevu de José Ángel Hevia ta formáu por diez temes que repasen la trayectoria del gaiteru asturianu más internacional d’esti sieglu. Per un llau inclúi cinco pieces que yá formaren parte de Tierra de Nadie -‘Busindre Reel’, ‘Naves’, ‘El Garrotín’, ‘Barganaz’ y ‘Sobrepena’-; y, pel otru, otres cinco que tuvieren n’otros trabayos -‘Albo’, ‘Pericote’, ‘Fandango Los Llobos’, ‘Rubiercos’, ‘Marcha del Dos de Mayo’. Tolos temes tán regrabaos pa da-yos un soníu más actual y revisitar dalgunos aspectos compositivos.
Amás d’esta cita y pa zarrar un mes nel qu’hubo n’Asturies una montonera eventos dedicaos a la gaita, Hevia va alcontrase col alumnáu del CONSMUPA y los Conservatorios Profesionales d’Uviéu y Xixón. Va ser el miércoles 26 a les 17.45h, dientro de les Xornaes Culturales del Conservatoriu Profesional «Anselmo González del Valle» (Uviéu).
José Ángel Hevia (Xixón, 1967) ye’l gaiteru asturianu más popular d’esti tiempu. Con namás 7 años entamó a tocar la gaita y nestes décades d’actividá foi fundador de bandes de gaites, ganó los premios más prestixosos del mundu y foi ún de los precursores de la gaita midi. Representó a la cultura y a la llingua d’Asturies n’escenarios de tol planeta a los que llevó la so propuesta musical qu’amesta pieces populares, composiciones propies y soníos electrónicos y new age. La publicación d’esti Platinum Europe Award. 25 Aniversario ye un homenaxe a esta exitosa carrera.
Suscríbite a les nuestres novedaes
