Ana Feito (La Pola Siero), Alba Suárez (Llaviana) y Alba Estrada (El Berrón) formen Rellume, el nuevu y prometedor grupu de pandereteres moces que va poder sentise bien ceo, anque elles lleven cuasique tola vida tocando, cantando y baillando en dellos coleutivos de música tradicional como’l Grupu de Baille Tradicional Fitoria, el Grupu Folclóricu y d’Investigación El Ventolín, y Muyeres -nel casu d’Alba Suárez-. Quieren facer el so propiu repertoriu de música pal baille, respetando les estructures tradicionales, pero piensen buscar el so toque personal.
Les tres embárquense nel proyectu pola «pasión que sentimos y compartimos pola música y el baille, de lo nueso, de lo tradicional del país», pero l’emburrión definitivu y los primeros ensayos aportaron gracies a una broma na última edición del FolkAyer, un «xuntóse con topóse, como bien diz una güela», almiten. Les ganes de crear, compartir y d’esfrutar de lo que más-yos presta ye lo que-yos llevó a tomar esa broma en serio y presentase «con munches ganes, pero sobre too con muncha ilusión».
Ente les sos referencies, la fuercia de los grupos de muyeres d’Asturies y Galiza: «Criámonos sintiendo a Pandereteres de Fitoria, Herbamora y Muyeres, pero cómo nun mencionar tamién a 6 Riales y Algaire, referentes en llogros y formatu n’escena. Falando de fuera, fixámonos ensin dulda en Galiza. Al igual qu’en casa, hai un montón de proyeutos que nos inspiren. Facemos especial referencia a grupos como Ailá, Adufeiras de Salitre y Tanxugueiras». Foi precisamente esa fuercia y potencia la que-yos resolvió la gran incógnita del nome que queríen. Tuvieron claro que Rellume cumplía con tolo que necesitaben: allumar col ruxerrux de la percusión y el brillu de les sos voces como los rellámpagos na tormenta.
Suscríbite a les nuestres novedaes
