La Folixa na Primavera enllena Mieres de cultura’l país un añu más

Como cada añu, Mieres enllénase de música’l país cola Folixa na Primavera. Del 4 al 6 d’abril va haber baille tradicional, gaita, electrónica, folk, rock, tarde en danza y conciertos nel Parque Xovellanos y nel d’Aníbal Vázquez, en Mieres Centru Cultural, nes places Requexu y La Pasera, y peles cais de Mieres del Camín. Too ello va tar acompañao d’otres actividaes pa un públicu de toles edaes nes que la sidra, la gastronomía y la cultura’l país son el puntu d’alcuentru.

Nesta edición, Mari Carmen Santos y Luis Ángel Fernández, del GF Prau Llerón, van dar el pregón. De siguío, L’Entamu marca l’aniciu de les actividaes musicales el vienres 4. La Banda Gaites Villa de Mieres y les agrupaciones llocales L’Artusu, Prau Llerón y Ruxidera van xubir al escenariu del Parque Xovellanos a les 21h. Llueu llega’l turnu de la pandereta revolution y la electrónica cola actuación d’Herbamora a les 23h. Darréu, un poco dempués de medianueche, los gallegos Xurxo Fernandes & Pan. Sen. Fron. tornen a xubir a un escenariu asturianu.

Pal sábadu 5, la programación entama a les 12h con xuegos pa la reciella a cargu de Guardianes del Planeta. Mentanto, L’Artusu, Ruxidera, Prau Llerón y la Banda de Música de Mieres van facer un pasucais pela villa. El son y el baille sigue a les 20h con una Tarde en Danza na que van tocar la bandina L’Andecha Turcipié y 6 Riales. Dempués de más xuegos pa la reciella con Xuegos de la Pumarada, los conciertos entamen a les 22h cola vuelta a los escenarios del grupu de folk-rock Skanda cola participación de la Banda Sinfónica del Atenéu Musical de Mieres y la Banda de Gaites Villa de Mieres. La banda moza Guieldu va poner el ramu a la nueche dende les 23.30h pa presentar el so discu recién asoleyáu Memories de Deva.

Cancios de chigre y vermú

La Folixa na Primavera de Mieres fina’l domingu 6 cola tonada y la gaita de los Cancios de Chigre na Plaza Requexu y la cai Jerónimo Ibrán dende les 12.30h, el Vermú Folixa Underground con Fañagüeta DJ ente les 13.30h y les 16h na plaza La Pasera y, nel mesmu intre, una representación de teatru de cai nel Parque Xovellanos. Toles actividaes son de baldre y hai serviciu de buses curuxa ente delles poblaciones del conceyu.