Outru-Andare ye’l proyectu nuevu de música tradicional del Suroccidente asturianu y el Val.le de L.laciana d’Alba Menéndez (6 Riales) y Jose Manuel Sabugo ‘Sabu’ (D’Urria). Coles sos voces, la pandereta, el pandeiru y l’acordión interpreten repertoriu pal baille col envís, según les sos pallabres, «d’esparder la cultura ya la música de los pueblos, ya faer que la xente esfrute con nós bail.lando como faían antaño». Falamos con Alba Menéndez p’afondar nesta nueva etapa como dúu, la importancia del territoriu na cultura tradicional y les perspectives futures d’Outru-Andare.
¿Por qué’l nome d’Otru-Andare? ¿A qué fai referencia?
Outru Andare ía una espresión que comparten Suroccidente ya L.laciana que quier dicir «outra manera de ver las cousas», outru andar. Cuando nos punximos una tarde a buscar nomes queríamos que fuera dalgo que compartiéramos los dos territorios y nos reprensentara, y asina topamos nun llibru d’Eva Gónzalez de Palacios la espresión ya paeciónos al pelu. Yá que nós yá tenemos los nuesos proyectos, esto evidentemente ía Outru-Andare onde nos centramos más na música tradicional de la zona puramente pal baille.
Dambos tenéis una trayectoria bayurosa na música y el folk con otros proyectos, ¿qué queréis aportar agora con Outru-Andare?
Los dos somos personas mui avenceyadas a los raigaños de la música tradicional. Sabu crecióu en Rabanal viendo a Las Lolas de Rabanal tocar el pandeiru, deprendióu del buelu a tocar l’acordión con repertoriu pal baille que se formaba nel propiu pueblu de Rabanal, crecióu escuitando la música ya viendo’l baille en L.laciana. You [Alba] criéime en Cuideiru deprendiendo cantares de mio buela la de Piñera ya escuitando a mios buelos cuntar las historias de cuando iban al baille, de cuando venía’l gaiteiru a la braña a tocar… Criámonos viendo esa comunidá de pueblu que xeneraba la música’l país; ya por eso ía qu’anguaño a la xente-y presta baillar y xuntase, decidimos faer Outru-Andare y asina tamién caltener lo que los nuesos nos dexaron ya lo que nós siguimos deprendiendo nos pueblos, llevándolo a los nuesos días actuales pa que la xente nun pare de baillar.
«Los dos somos personas mui avenceyadas a los raigaños de la música tradicional. Criámonos viendo esa comunidá de pueblu que xeneraba la música’l país»
Nesi sen, ¿qué deprendizaxes de los otros proyectos pensáis que tais volcando nesta esperiencia conxunta?
Home, la esperiencia y los kilómetros lo primero. Los dos sentimos ya vemos nos nuesos conciertos colos otros proyectos lo que-y gusta a la xente baillar, pasalo bien, l’averamientu qu’hai pa cola cultura ya la música tradicional del país… Ya nós nun paramos d’estudiar, d’indagar, de deprender sobre los cantares ya toques; vamos a clase con Ramses Ilesies. Tou esto ayúdanos a entender cada vez más la riqueza qu’había y hai nos pueblos, el gran tesoru que tenemos ya que nos dexaron y del que sentimos muitu arguyu, y defínenos ya represéntanos como personas.
«Nun paramos d’estudiar y deprender sobre los cantares ya toques. Ayúdanos a entender cada vez más la riqueza qu’había y hai nos pueblos, el gran tesoru que tenemos ya que nos dexaron y del que sentimos munchu arguyu»
¿Qué importancia tien el territoriu nel proyectu? ¿Por qué decidistis centravos na música recoyida nel Suroccidente asturianu y L.laciana?
Principalmente porque fue lo que nos unió. Sabu ya you conocímonos nun cursu de pandereta qu’impartían Ramses Ilesies ya Xosé Antón Ambás en Trabáu (Degaña) de la mano d’El Rincón Cunqueiru, colo cual, de Rosa ya Vitorino nel 2016. El cursu taba enfocáu al repertoriu del mismu pueblu, onde pudimos esfrutar d’a Tía María -informante ya gran tocadora de pandereta de la zona-, de Mariluz d’Il Corralín -otra gran mucher, informante ya gran tocadora de pandereta tamién-. D’esos alcuentros salieron xuntanzas y amistades que siguen vivas. Pal suroccidente ya L.laciana nun hai llindes, son territorios hermanaos en muitísimos aspectos ya la música ya la cultura ya uno d’ellos. Colos años siguimos atopándonos pela zona ya estrechando llazos hasta güei, lo que nos llevó a compartir cultura ya conocimientos ya envolcanos nesta aventura.
Con esti espoxigue que paez que vien viviendo’l mundu de la pandereta, entamaron a plategase alderiques sobre’l papel de les informantes como creadores y intérpretes en vez de namás -que tamién- como caltenedores y guardadores de la tradición, ¿cómo lo veis vós?
Yeran ya son unas artistas con muitu xeitu que tocaban ya tocan que lo queman, como dicen na zona. La riqueza ya’l patrimoniu que nos dexaron ye d’un valor incalculable, con una bayura de toques y adornos que tovía tamos descubriendo anguaño. Pa nós nun hai alderique porque son tou eso: creadoras de xácaras que nos deixan un gran patrimoniu llingüísticu y un conocimientu sobre’l territoriu ya la vida, intérpretes como las que más d’una riqueza de toques de pandereta ya pandeiru increíbles, caltenedoras de los sones ya los bailles, guardianas d’un patrimoniu únicu que nos define como pueblu. Cuando yes de los territorios au sigue vivu’l repertoriu ya relaciónaste con ellas ya ellos daste cuenta de tou esto ya más, al puntu de que nunca deixas de deprender.
Entós, ¿cuála sedría la vuestra función nesa cadena dende Outru-Andare?
La de llevar los conocimientos adquiríos a lo llargo la vida al escenariu pa que siga viva la tradición, xuntar a la xente, faela baillar, esparder la cultura, xenerar alderiques, compartir ya medrar xuntos. Porque toos xuntos, bailladoras ya bailladores, tocadoras ya tocadores, ye la manera de caltener vivu’l patrimoniu ya la tradición. Asina qu’a rir, toucar ya baillar hasta estoupar.
«Toos xuntos, bailladoras ya bailladores, tocadoras ya tocadores, ye la manera de caltener vivu’l patrimoniu ya la tradición»
Pa finar, estrenástisvos nel branu pasáu nel Mercáu de Porrúa, ¿qué perspectives de presente y futuru tenéis? ¿Podéis avanzanos dalguna fecha pa vevos en directo?
Menudu estrenu, casi nada. Pa nós Porrúa ya casa. Fue la xente que ta detrás del mercáu la que nos animó a xuntanos, asina qu’esti añu volveremos al pueblu de Porrúa; ¡tai sollertes!
La perspectiva que tenemos ía xuntanos, pasalo bien ya esparcer ya algamar vivencias y conocimientos, ya llevar la nuesa música pol mundu. Polo pronto hai dalguna fecha nel aire tovía ensin zarrar, pero la próxima vegada que nos vamos xuntar vei ser en Llión, el día 16 de mayu nel Bar Ferecor.
Revisión llingüística al asturianu occidental: Laura Marcos.
Suscríbite a les nuestres novedaes
