En 2013 la Oficina de Normalización Llingüística de Xixón y dellos centros escolares d’esti conceyu entamaron Cantar Presta Muncho, una iniciativa pensada pa favorecer la creación de coros nes escueles de Xixón, y pa que l’alumnáu s’avere a la música coral y tradicional d’una manera cenciella, abierta, activa y participativa. Nacho Fonseca ye’l coordinador del proyectu qu’esta selmana -llunes 19, martes 20 y xueves 22- va sonar a les 10.30h enriba l’escenariu del patiu del Centru de Cultura Antiguu Institutu.
El llunes 19 actúen escolinos y escolines del Colexu San Lorenzo, CP Clarín, CP Manuel Martínez Blanco y CP Río Piles; el martes 20 faénlo del Colexu La Milagrosa, CP Cabueñes y CP Jovellanos; mentes que’l xueves 22 xube al escenariu del CCAI l’alumnáu del CP Nicanor Piñole, CP Ramón de Campoamor, CP Rey Pelayo y CP Begoña. Son en total once centros educativos los que participen nesta iniciativa anque, como despliquen dende la FMECyUP, ufierten el proyectu «a tolos colexos d’Educación Primaria del conceyu de Xixón, a los que yá tienen coru escolar y a los qu’ensin tenelu-yos abulta interesante la propuesta».
El músicu, mayestru xubiláu y fundador de Xentiquina, Nacho Fonseca, coordina y asesora al profesoráu que participe en Cantar Presta Muncho pa que seya quien a desenvolver los conteníos propuestos de la meyor manera posible. Los temes parten del cancioneru tradicional asturiano y de música más moderna y los coros cunten como material d’apoyu pal desarrollu de l’actividá un cancioneru que recueye 70 cantares tradicionales y modernos con lletra, partitura y discu con bases musicales. Con doce ediciones yá celebraes, esta iniciativa yá ye un destacáu eventu nel calendariu xixonés rellacionáu cola música y cola normalización llingüística.
Suscríbite a les nuestres novedaes
