L’Arcu Atlánticu, nacíu nel añu 2012 y entamáu pola Fundación Municipal de Cultura, Educación y Universidá Popular de Xixón, arancó ayeri oficialmente y, dende esti martes, son delles les actuaciones n’asturianu que van poder vese. Esti añu 2026 ta celebrando la so XI edición, ente’l llunes 27 de xunetu y el domingu 2 d’agostu, anque yá hebo actividaes previes a la inauguración dende’l vienres 24.
Tres l’actividá previa del sábadu pasáu, col conciertu N’Alcordanza, un homenaxe a les figures d’Ígor Medio y Carlos Redondo, onde actuaron grupos como Llan de Cubel, Hermanos Castro o Felpeyu, el festival programa delles actuaciones más alredor de la música n’asturianu.
El martes 28, na Plaza del Periodista Arturo Arias, Rellume va ufiertar un conciertu a les 19:00 hores. El tríu de pandereteres formáu por Ana Feito, Alba Suárez y Alba Estrada lleva asina la música tradicional a unu de los espacios más reconocíos del barriu playu de Cimavilla.
Al día siguiente, el miércoles 29, nel mesmu barriu pero na Plaza Xovellanos, va ser el turnu de Llau. El tríu formáu por Dani Álvarez (gaita, xiblates y bodhram), Lisardo Prieto (violín) y Luis Nicolás (guitarra) van tocar a les 19:00 hores. Esi mesmu día tamién se va inaugurar nel vestíbulu de la segunda planta del Centru de Cultura Antiguu Institutu la esposición Postales N’alcordanza d’Ígor y Carlos, disponible hasta’l 30 d’agostu y que recueye dellos cartelos n’alcordanza de los dos músicos finaos.
El xueves 30 los encargaos de poner música asturiana al Arcu Atlánticu van ser Llueñe. El grupu de creación recién formáu por Alba Gutiérrez, David Varela y Adrián Argüelles van tocar na Plaza Xovellanos de Cimavilla a les 19:00 hores.
Pela so parte, el vienres 31, l’Arcu Atlánticu programa dos actividaes musicales n’asturianu. D’una banda, a les 19:00 hores y na Plaza Xovellanos, actúa’l tríu de folk Picarós, formáu por Iván Álvarez (gaita, gaita MIDI, flautes, voz), Juan Yagüe (guitarra) y Chus Fernández (percusión). D’otra, el Centru de Cultura Antiguu Institutu acueye a les 20:30 hores l’actuación d’Escontra’l Raigañu. Esti grupu d’Avilés propón un viaxe sonoru pelos sos 43 años de trayectoria. Reinterpreten pieces de los sos trabayos de campu, dalgún tema de les sos collaboraciones discográfiques y cantares deprendíos con colectivos colos que compartió escenariu en Muyeres.
Yá’l sábadu 1 d’agostu, trespasando les llendes de la so comarca de L.laciana, el dúu Tsacianiegas, formáu Raquel y Laura Álvarez Alonso, va dar un conciertu na Plaza del Periodista Arturo Arias a les 19:00 hores.
Como vien siendo vezu nos últimos años, el Día d’Asturies en Xixón va sirvir pa poner el ramu al festival y zarrar los actos del Arcu Atlánticu’l domingu 2 d’agostu. Dende les 11:00 hores, Cimavilla va enllenase de tradición y, a les 12:00, va dar empiezu’l desfile, que va cuntar cola participación d’hasta 18 grupos folclóricos o bandes de gaites: Banda de gaites Villa de Xixón, Banda de gaites Garulla, Banda de gaites infantil Magüeta de Xixón, Banda de gaites Jovellanos, Grupu folclóricu L’Alegría de Porceyo, Música y Baille Tradicional Excelsior, Coros y Danzas Flor de Xaranzaina, Andecha de Música Tradicional Na Señardá, Grupo de Coros y Danzas del Real Grupo
de Cultura Covadonga, Grupu folclóricu Marabayu, Grupu Folclóricu Trebeyu, Escuela de Música Tradicional Trubiecu, Grupu folclóricu El Xiringüelu, Grupu folclóricu El Xolgoriu, Agrupación folclórica asturiana Los Xustos, Banda Gaites Noega, Banda de Gaitas Conceyu de Xixón y Banda Gaites Saxum. Tres d’ello, va baillase la Danza d’Ambás a les 13:00 hores en L’Atalaya y, darréu, va facese la tradicional puya’l ramu.
Suscríbite a les nuestres novedaes
