Anque hai dellos años paecía qu’Asturies taba al marxe del circuitu de los grandes festivales, pasín ente pasu foi entrando nél y estos macroeventos musicales foron incorporándose como un elementu más —non menor— del ociu rellacionáu cola cultura nel nuestru país, convirtiéndose nuna opción pa muncha de la rapazada, y non tan rapazada, asturiana. Son yá unos cuantos los festivales multitudinarios que se desenvuelven equí (Riverland, Boombastic, Tsunami, Aquasella…); una realidá sobre la que se tien especulao abondo con que se taba creando una burbuya económica alredor d’ellos y que’l so pinchazu diba ser aína. Lloñe d’ello, cada añu rexistren una asistencia bultable y unes cifres astronómiques. Nesti sen, si enantes yeren les multinacionales discográfiques quien controlaben el business musical, anguaño son esti tipu d’eventos los que les suplantaron, los que controlen el mercáu de la música. Esti poder, cada vez concéntrase en menos manes, mandando unes poques promotores que, en dellos casos, tienen fondos d’inversión detrás ensin nengún enfotu de tipu cultural o social.
«Son yá unos cuantos los festivales multitudinarios que se desenvuelven equí; una realidá sobre la que se tien especulao abondo con que se taba creando una burbuya económica alredor d’ellos y que’l so pinchazu diba ser aína. Lloñe d’ello, cada añu rexistren una asistencia bultable y unes cifres astronómiques»
Dende hai yá un tiempu vienen llevantándose voces que cuestionen la esencia d’estos macrofestivales y lo que representen, convertíos anguaño en maratones de varios díes nos que l’asistente vese «obligáu/ada» a ver decenes de conciertos. La realidá ye qu’estos eventos son un modelu de negociu que, xeneralmente, funciona perbién pa quien lo organiza pero non tanto pa quien, en teoría, va dirixíu: la xente aficionao a la música. Y ye que la concentración y el monopoliu acabaron siendo perxudiciales pal públicu, disparando los precios hasta’l puntu de convertir nun artículu de lluxu dir a un conciertu, daqué necesario pa caltener esti modelu de negociu tan rentable. La lóxica d’esti tipu de festivales ye bien cenciella: programar una montonera de grupos pa que la xente tea dientro del recintu’l mayor tiempu posible y gaste’l máximu dineru posible, hasta’l puntu de qu’hai festivales qu’ingresen más perres pola barra que pola venta d’entraes. Y esto por nun falar de la situación de los/es trabayadores, qu’en bien de casos tán en situación de precariedá a tolos niveles. El problema surde cuando nos vemos somorguiaos nel marcu capitalista que nos convez —o imponnos— qu’esta ye la manera de consumir la música; «consumir» nel sentíu más lliteral de la palabra.
«Son un modelu de negociu que, xeneralmente, funciona perbién pa quien lo organiza pero non tanto pa quien, en teoría, va dirixíu: la xente aficionao a la música. Y ye que la concentración y el monopoliu acabaron siendo perxudiciales pal públicu, disparando los precios hasta’l puntu de convertir nun artículu de lluxu dir a un conciertu»
A estes xeneralidares, xúntase’l fechu concretu y pergrave de que, en dellos casos, falamos d’empreses que foron absorvíes por fondos utre, mayormente inversores estauxunidendes. Ye’l casu de Superstruct Entertainment, xigante internacional del espectáculu, que participa en bien de festivales del Estáu y en dalgún asturianu, adquirida por Kohlberg Kravis Roberts (KKR), marcadamente prosionista y con promociones inmobiliaries na Palestina ocupada. Fondos qu’invierten en festivales musicales como pueden facelo en criptomonedes, n’hoteles en Kazajistán o en cases d’apuesta en Kenia.
«Pa siguir medrando nun país de les característiques d’Asturies —limitáu poblacionalmente y avieyáu—, onde los verdaderos aficionaos a la música son los que son, llega un momentu nel que la única manera de qu’asista una cantidá de persones considerable ye incorporando un perfil de públicu que nun ta especialmente interesáu na música, sinón más en pasar un fin de selmana de fiesta, independientemente de quien actúe»
Per otru llau, hai tovía bien de xente que sigue viendo estos festivales como espacios pa descubrir a grupos o artistes, más allá de los de la so estricta preferencia o gustos; el problema ye que les empreses promotores tán condicionaes dafechu pola lóxica capitalista y namás quieren medrar y espoxigar pa xenerar más beneficios y que’l negociu funcione. Sicasí, pa siguir medrando nun país de les característiques d’Asturies —limitáu poblacionalmente y avieyáu—, onde los verdaderos aficionaos a la música son los que son, llega un momentu nel que la única manera de qu’asista una cantidá de persones considerable ye incorporando un perfil de públicu que nun ta especialmente interesáu na música, sinón más en pasar un fin de selmana de fiesta, independientemente de quien actúe. Esto va en detrimentu de los que realmente quieren disfrutar de la presencia y la música de les sos bandes y artistes favoritos, a los que bien de veces nun lleguen a ver más qu’al traviés de les pantalles, viviendo una realidá que nun saben mui bien si la disfrutaron o la sobrevivieron…
«Nun tien munchu sentíu que’l beneplácitu políticu —cuando non económicu— s’enfote nesta clas d’eventos con precios y entraes elevaes. Tiéndese a apoyar estes propuestes, cuanto más grandes meyor, en cuenta d’equilibrar la balanza del mercáu sofitando iniciatives más pequeñes, inmediates y/o asequibles, que garanticen l’accesu de la cultura, nesti casu la música, a la población de tol país»
Otra derivada d’esti asuntu ye’l papel de les alministraciones públiques, qu’inclúin como un llinia de la so política cultural destinar ayudes a esti tipu de festivales, cuando yá son rentables y autosuficientes; falamos d’ayudes directes o indirectes, económiques, de servicios o de permisos. Nun tien munchu sentíu que’l beneplácitu políticu —cuando non económicu— s’enfote nesta clas d’eventos con precios y entraes elevaes. Tiéndese a apoyar estes propuestes, cuanto más grandes meyor, en cuenta d’equilibrar la balanza del mercáu sofitando iniciatives más pequeñes, inmediates y/o asequibles, que garanticen l’accesu de la cultura, nesti casu la música, a la población de tol país. Nes últimes decades vivimos nuna Asturies entregada fondamente al turismu, dende’l poder polítitu entiéndense los macrofestivales como un reclamu y un axente d’esi sector, pensando únicamente nel impactu económicu. L’alministración, cómo mínimu, tendría que cuidar y asegurar que se cumpla la llei, por exemplu en cuestiones esenciales como los precios, l’ingresu llibre a los recintos de bebida y comida particular o la contratación y condiciones de los y les trabayadores.
«Son perinteresantes iniciatives como la puesta en marcha pola Xunta de Galicia, creando nel 2018 una marca llamada FEST Galicia pa promocionar el territoriu gallegu como destín musical, baxo criterios de calidá y sostenibilidá. Con ello quieren afitar un modelu gallegu de festivales, apostando pola sostenibilidá social y medioambiental, asina como pola proyección de la música gallega»
Más allá d’ello, son perinteresantes iniciatives como la puesta en marcha pola Xunta de Galicia, creando nel 2018 una marca llamada FEST Galicia pa promocionar el territoriu gallegu como destín musical, baxo criterios de calidá y sostenibilidá. Acueye festivales que funcionen de manera profesional y que se preocupen por ufiertar valores venceyaos a la esperiencia musical, faciéndolo al traviés de tolo que tresmiten, tanto dende la so ufierta d’actividaes como na so xestión y organización. Con ello quieren afitar un modelu gallegu de festivales, apostando pola sostenibilidá social y medioambiental, asina como pola proyección de la música gallega. Esti modelu distínguese pola seriedá y rigurosidá de los festivales, la puesta en valor de la industria gallega y la vertebración del territoriu al traviés d’eventos qu’atrayan a residentes y visitantes. Les sos característiques principales son: fomentu de la sostenibilidá (los festivales incluyíos en FEST Galicia han cumplir con criterios de sostenibilidá, promoviendo práctiques responsables na xestión de residuos, l’usu d’enerxíes renovables, y l’accesibilidá pa tolos públicos), la calidá y profesionalización (búscase elevar el nivel de los festivales gallegos, ufiertando esperiencies musicales arriquecedores y garantizando una xestión profesional y tresparente), y la promoción de la música gallega (FEST Galicia busca impulsar la carrera d’artistes y bandes gallegues, asina como dar visibilidá a la música tradicional y contemporánea del país).
«Tamién tenemos la suerte de contar n’Asturies con un entramáu de pequeños y medianos festivales de calter asequible, entamaos de manera comunitaria, asociativa, autoxestionaos o por promotores locales independientes. Ente toos ellos igüen una rede que vertebra musicalmente al nuestru país, ufierten una programación variada y pa tolos gustos, con precios razonables o gratuitos y con un tratu al públicu afayadizu y candial»
Por suerte y paralelamente a la realidá de los macrofestivales tamién tenemos la suerte de contar n’Asturies con un entramáu de pequeños y medianos festivales de calter asequible, entamaos de manera comunitaria, asociativa, autoxestionaos o por promotores locales independientes. Ente toos ellos igüen una rede que vertebra musicalmente al nuestru país, ufierten una programación variada y pa tolos gustos, con precios razonables o gratuitos y con un tratu al públicu afayadizu y candial. Falamos de propuestes como’l Festival Intercélticu d’Avilés, Festival Intercéltico d’Occidente (Tapia), Noite Celta de Porcía (El Franco), Nueche Celta de Granda (Xixón), Nueche celta de Candás, Xixón Folk, Festival Internacional de la Gaita (Villaviciosa), Ochobre Folk (Mieres) Xornaes del Vigulín (Piloña), Zarréu Fest (Degaña), La X.O.T.A (Llanes), Semando Fest (Uviéu), Cachu Fest de Trabáu (Degaña), Prestoso Fest (Cangas del Narcea), Folixa de la Sidre (Ribeseya), Regodón Llaviana, Festival Internacional de Jazz de Güeñu (La Ribera), Válgame Fest (Cabrales), Maízu Rock d’Intriago (Cangues d’Onís), Unirock de Veiga (Navia), L.luarca Metal Days (Valdés), A Veiga Rock, La Carriona Rock (Avilés), Vidiagu Rock (Llanes), Ewan Fest (Castrillón), Rockvera (Corvera), Una Señora Fiesta de Vegarrionda (Piloña), La Grapa Black Music Festival (Avilés), La Mar de Ruido (Avilés), Vesu (Uviéu), Gijón Sound (Xixón), Emerxentes… Ente toos ellos faen d’Asturies un país musicalmente vivu y dinámicu, una bayura a protexer y promocionar, espacios nos que compartir el talentu llariegu col internacional, que permiten caltener activu’l texíu sociocultural de los nuestros pueblos y ciudaes en contraposición al capitalismu xabaz festivaleru.
«N’Asturies, la semiente ta llantada con bien de propuestes conscientes d’ello y comprometíes con esta tierra, colos sos artistes y con un públicu con ganes de vivir y disfrutar dafechu la esperiencia de la música en vivo»
Nel llibru imprescindible sobre esti asuntu, tituláu Macrofestivales. El agujero negro de la música (Península Ediciones, 2023), el periodista catalán Nando Cruz plantega la idea de lo que’l denomina «festivales fértiles» —en contraposición a los macrofestivales como máquines depredadores del capitalismu y un turismu insostenible—, un tipu d’eventos musicales que seyan un espaciu dende onde crear y dar fertilidá a la zona, atrayendo y contratando a grupos llocales y alimentando la cultura y ecosistema del llugar. N’Asturies, la semiente ta llantada con bien de propuestes conscientes d’ello y comprometíes con esta tierra, colos sos artistes y con un públicu con ganes de vivir y disfrutar dafechu la esperiencia de la música en vivo.
Suscríbite a les nuestres novedaes
