Supongo qu’una de les coses inevitables de dir cumpliendo años y peñando canes ye esi ser consciente de que les coses cambien y que nun son como les conocimos, amás de l’impulsu irrefrenable de facé-ylo saber a la xente más mozo. Lo que se conoz como “cuntar batalles”. Yo tampoco soi de les que más batalles tienen que cuntar, pero como quien nun quier la cosa, el primer conciertu pola oficialidá al que fui pagué la entrada en pesetes, conque yá llovió lo suyo.
Empecé a dir a los conciertos más o menos al tiempo que me dexaron salir ensin hora de volver, más o menos cuando la universidá (esi primer añu tuvi que marchar primero pa garrar l’últimu tren pa Mieres). Yo andaba mayormente con xente unos años mayor que yo, y los más d’ellos con una bona conciencia llingüística y social; los que nun teníen tanto d’eso, diben polo bien que se pasaba. Daquella ironizábemos cola comparanza ente lo que nos traía la temporada abril-mayu y les fiestes patronales d’un pueblu: nun faltaben la procesión (la mani del día de les Lletres) y la misa (l’actu de l’Academia). El conciertu pola (llamábemoslu asina, ensin falta añadir polo que que se facía) yera la verbena. Nun se preguntaba “¿Vas dir al conciertu pola?”, sinón “Vémonos nel conciertu, ¿o qué?”. A mi prestábame abondo la casualidá de que munches veces cayó al llau del mio cumpleaños y cola mayor parte de la xente nun tenía nin que quedar, sabía que diben tar ellí. Fueron munchos años de cites anuales qu’apuntalaron amistaes fraguaes al calor d’un enfotu común pola cultura y la llingua asturiana, amás de regaes con bien de “lubricante social” (lléase: alcohol), que too lo enguapez.
«Hai que tener en cuenta que tamos falando de los años del arecismu y Javier Fernández, onde l’asturianismu nun yera precisamente mainstream: estos conciertos y ciertos chigres y eventos como les nueches celtes yeren los nuestros “espacios seguros” del bable enantes d’esistir el conceptu»
En cualquier casu, nun se pue facer de menos la dimensión social y folixera que tenía la reinvindicación llingüística pa la xente de la mio xeneración. Hai que tener en cuenta que tamos falando grosso modo de los años del arecismu y Javier Fernández, onde l’asturianismu nun yera precisamente mainstream: estos conciertos y ciertos chigres y eventos como les nueches celtes yeren los nuestros “espacios seguros” del bable enantes d’esistir el conceptu. Sicasí, n’años onde’l conciertu foi especialmente potente yo llegué a ver a xente que nunca esperaba ver nun actu que tampoco escondía la so vocación política.
Pero, siguiendo cola alegoría de la fiesta, en munchos casos, “d’hoi nun añu”: quiciabes una autocrítica que podamos facenos l’asturianismu ye que nos dexemos cayer nesa ritualización tan cómoda, a pesar de que nos momentos de más fuercia militante (y de más represión/indiferencia institucional, recuerdo) llegó a haber dos manifestaciones de reivindicación llingüística al añu con bien de xente en caúna d’elles.
«Reconocer el trabayu tan tremendu de la Xunta Pola Defensa de la Llingua Asturiana a lo llargo de tou esi tiempu: amás de les actuaciones desinteresaes de los y les músiques, aquellos turnos de barra, montaxes y desmontaxes, xestiones, pegada de cartelos, repartu d’entraes pelos chigres collaboradores y otros mil llabores grandes y pequeños»
Prometo que voi falar de música nesti artículu, pero lo que me pide agora la conciencia, faciendo memoria cola ayuda del llibru La banda sonora de la oficialidá, que se publicó nel 2019 pa dar cuenta, precisamente de los 30 años de conciertu, ye reconocer el trabayu tan tremendu de la Xunta Pola Defensa de la Llingua Asturiana a lo llargo de tou esi tiempu: amás de les actuaciones desinteresaes de los y les músiques, aquellos turnos de barra, montaxes y desmontaxes, xestiones, pegada de cartelos (llegué a sacar una foto nel 2013, trabayando pela zona, na entrada mesma d’Asturies na ría de Tinamayor: ye mui posible qu’hubiere otru al pie de la Ría del Eo), repartu d’entraes pelos chigres collaboradores y otros mil llabores grandes y pequeños que lleva facer un eventu d’estes característiques, y too ello de manera altruista. Mete mieu hasta pensalo.
Por eso, una cuestión un poco agridulce de la vuelta del conciertu pola son estes condiciones de semiprivatización nes que se fai. “Ponte tu a facelo”, pensará quien llea esto, y bien pensao. Pero yo soi de valorar más l’acción que la pureza y bien ta que vuelva a arrancar esti puntu d’alcuentru importante p’atopase agora que cada vez too ye más virtual y que llevamos años perdiendo “terceros espacios” (lléase: chigres) por cuenta de les distintes crisis y avatares varios de la vida adulta. Pero pa otres ocasiones taría bien que se valorare la posibilidá de que la organización cuntare con una plataforma d’asociaciones o entidaes afines, o inclusive xente particular voluntario, que dexare recuperar l’espíritu autoxestionáu y popular del conciertu. Porque, otra cosa, repasando los cartelos que salen nel llibru enantes mentáu, rescampla la escalada nos precios de les entraes (que siempre foi bien asequible, pa lo qu’ufiertaba, lo que me reafirma na sospecha de que con toa esa xente mozo que chumábemos como burros, lo realmente provechoso del conciertu yera la barra). Ente’l preciu de la entrada y los papeleos que piden pa dexar entrar menores d’edá (qu’igual ye asina en toos llaos agora, nun lo sé), difícilmente diben poder repitise les esperiencies que cunta Xicu Ariza, vuelvo a referime al llibru de la Xunta, d’una panda de rapaces d’instituto que s’averen al conciertu pola folixa y acaben faciéndose “de la secta”.
«Bien ta que vuelva a arrancar esti puntu d’alcuentru importante p’atopase agora que cada vez too ye más virtual y que llevamos años perdiendo “terceros espacios”. Pero pa otres ocasiones taría bien que se valorare la posibilidá que dexare recuperar l’espíritu autoxestionáu y popular del conciertu»
Pero, a ver: música. Que non too va ser foryú. Que, anque fuere un eventu social, nun se pue negar que los conciertos yeren festivales en toa regla, cola ventaya amás, de que siendo la llingua’l nexu d’unión, la variedá musical yera amplia (quitando la falta de presencia nos xéneros urbanos y más comerciales que tovía agora tien l’asturianu) y eso facíate abrite a sonoridaes que nun yeren les tuyes. ¿Qué grupu o cantante quedó ensin xubir a esi escenariu? Pa detrás, diría que la presencia nestos conciertos d’artistes afines a la causa pero que nun trabayaben principalmente n’asturianu ayudó a afianzar la rellación d’estes persones cola reivindicación llingüística y cultural, con resultaos bien felices. Y amás diría tamién que, haber nestos conciertos muncha presencia de xente de grupos folclóricos que baillaben y echaben dalguna pieza nellos vistíos de cai y en plan informal, dalgo tuvieron que tener que ver nel niciu de lo qu’agora conocemos como Nueche en danza. Esta vez, como en cada ocasión, vuelve haber la mezcla xusta ente lo conocío, lo nuevo y lo renovao.
Quién nos diera que llegare por fin el momentu de cambiar lo de “conciertu pola oficialidá” a otra nomenclatura y otres razones, como pensábemos cuando la última intentona d’emburriar pola reforma del estatutu. Pero, otra manera, bienvenida seya esta oportunidá p’atopase y disfrutar xuntes en clave asturianista, y enllazar cola xeneraciones nueves que ente’l COVID y otres coses nun llegaron a vivilo.
«Cuando nel 2019, Damián Barreiro m’escribió pa proponeme qu’escribiera un cuentu ambientáu nun d’estos conciertos, poco pensaba yo que nel siguiente conciertu diba ser él al que díbemos echar en falta. Anque nun va faltar del too porque munches y munchos vamos tenelu presente»
Échovos la despidía, y nun podía facelo ensin alcordame de Damián Barreiro. Cuando nel 2019, Damián m’escribió pa proponeme qu’escribiera un cuentu ambientáu nun d’estos conciertos y yo fici ún, un poco sentimental, onde acababa falando de los que marchen primero de lo que-yos toca, poco pensaba yo que nel siguiente conciertu diba ser él al que díbemos echar en falta. Anque nun va faltar del too porque munches y munchos vamos tenelu presente.
Semeya de portada: Espectáculu La Banda Sonora de la Oficialidá del XXXI Conciertu Pola Oficialidá (autoría de Pablo Semeyes)
Suscríbite a les nuestres novedaes
