Va unes selmanes vio la lluz en toles plataformes musicales FUMETAMORFOSIS, el cuartu discu de Mota Blues. L’álbum amuesa l’estilu provocador, desenfadáu y la personalidá de Chino El Indio; músicu autodefiníu como un «xuglar contemporáneu» y que dende va unos años ta averándose tamién a la música asturiana tocando col cantador Carlos Velasco y con otros músicos del país. Un reflexu d’esta cercanía a la música de raigañu ye ‘Nicotacum‘, ún de los singles d’esti discu nuevu nel qu’entemez blues con folk, con asturianada y collaboren el guitarrista Nel de Purnea, el gaiteru Rubén Alba, el percusionista Juanjo Díaz y el mentáu Carlos Velasco.
«Colos años decatéme que la música tradicional ye mui asemeyada seya d’onde seya. Los problemas d’un esclavu negru recoyendo algodón y d’un pastor de cabres son mui similares y gústame enseña-y a la xente que coses que na so cabeza tán mui alloñaes en realidá son lo mesmo», valora’l guitarrista cuando fala del so averamientu a los sones tradicionales d’Asturies. Reconoz que-y presta «acercase a otros xéneros por descubrir y afondar nellos», siempre qu’amuesen «un mínimu d’intelixencia». «Gústame tocar música que suene a chuleta de asturiana de los valles, non a Big Mac«, añade.
Asina ye como pa él foi natural ser la metá del proyectu que tien con Carlos Velasco: «Conocémonos de va munchos años, cuando La Pola tovía yera La Pola y parábemos nos mesmos bares: El Hache, El Cuévano del principiu, el Diañu, l’Abre César… Siempre tuvimos per esos sitios oscuros que teníen música en directo y un rollu pasota. D’aquella, él tocaba en Ochobre Ténebre, que llueu foi N’ochebre, y yo en Sabbathicus. Col pasu los años, dambos siguimos travesaos pel Cuévano colos instrumentos pel mediu asina qu’un día que necesitó quien lu acompañara a cantar unes pa la TPA, díxomelo y nun fizo falta ni mirales. Dende eso, entamaron a llamanos d’equí y d’allá y preparamos un repertoriu«. D’esta manera dan forma un proyectu col que traten de «d’axuntar les esencies» de los dos.
Amás de nesti dúu y de notra formación que tán cocinando xunto al responsable de la iniciativa Pendoneando, Iván Testón -del que se pudo ver una primer muestra nel programa Xuntanza de TPA col nome de Xuntances del Cuévano-, Chino El Indio sigue trabayando col so principal grupu, Mota Blues, una banda que presenta como «una cooperativa de colegues anti-sistema y faltosos con munchu sentíu del humor, que ta equí pa llevar la contraria, pa molestar y pa resistir contra esta sociedá individualista, tecnolóxica y fría que nos quieren meter a calzador».
«Lo mesmo facemos un bolo en tríu, que con una banda de nueve músicos» comenta esti artista que pon d’exemplu que nel discu grabaron más de quince músicos, «con collaboraciones que van dende Juanjo Díaz (percusionista de Rodrigo Cuevas, ente munchos) hasta Pablo García (Warcry)». Un exemplu d’esta «gran tribu de lisérgicos» foi la presentación en directo de FUMETAMORFOSIS: «Tuvo llugar en Motaland, un festival psicodélicu qu’inventamos onde’l rock nun ye namás música, sinón una manera de funcionar. Somos herederos del espíritu de Woodstock y Ortigueira y eso ye lo que nos mola ofrecéi a la peña que vien. Flípanos facelo nun sitiu que tea en contacto cola naturaleza, currámonos un montón d’escenografía, ponemos DJ’s y otres bandes, zona d’acampada, hai pa comer y pa chumar porque tenemos la nuestra marca de birra… En Mota l’oxetivu nunca foi facese ricos, sinón entamar unes de la virxen y que tolos que van vuelvan pa casa flipando».
Con FUMETAMORFOSIS Mota Blues amuesen la so versatilidá musical axuntando a lo llargo de 17 temes estilos como’l rock, la ranchera, el rap, la electrónica o’l folk de la yá mentada ‘Nicotacum’. Llingüísticamente, Chino El Indio usa davezu l’amestáu como forma d’espresión, dalgo que’l músicu defende por «naturalidá» y por cantar como fala, al estilu de los bluesman clásicos. Tres seis años cocinando esti cuartu trabayu y más d’una década de trayectoria, esti músicu sierense sigue con «boli y papel, guardando notes nun bolsu pequeñu del vaqueru y xuntándoles unes con otres» pa facer unes lletres que «van enantes de la música». Amás avisa: «el procesu de composición nunca para y enantes d’acabar con esti discu, yá entamé col que toi agora«. Polo que bien seya na so versión blues o tocando con otros intérpretes de música n’asturianu, va haber Chino El Indio enriba los escenarios per muncho más tiempu.
Suscríbite a les nuestres novedaes
