De dalguna manera, Skama la Rede y yo nacimos cuasi a la par. Ellos entamaron en 2003 y en 2004 dieron el so primer conciertu. Naquel tiempu yo tenía 14 años y foi a esa edá cuando entamé a dir a conciertos y movilizaciones, a desarrollar una conciencia política asturianista, a deprender a falar asturianu, a tocar nel mio primer grupu de música, a conocer a xente “del rollu”… a la fin, a ser lo que soi. Asina que pueo dicir que Skama la Rede lleven acompañándome toa esta vida. Por eso nesti testín voi ser d’esa xente tan cafiante que fala en primer persona cuando tien qu’homenaxear a un terceru. Pero ye qu’hai tantes alcordances personales que despliquen tan bien lo que foi y ye Skama la Rede pa la mio xeneración, que naguo por qu’esti posible egocentrismu puea quedar absueltu.
Aquel 2004 tamién nacía la organización de mocedá soberanista d’izquierda Darréu, qu’entamaba la so primer actividá pública homenaxeando’l 70 aniversariu de la Revolución d’Ochobre de 1934. Tocaben nel Albéniz de Xixón La Tarrancha, Skama la Rede, Skontra, Habeas Corpus y Skalariak. Alcuérdome de nun ver a Skama por tar chumando fuera de la sala; caleciendo pa entrar directamente a Skontra, que daquella yeren un cachu más conocíos. Y eso qu’un collaciu avisó: «Skama molen muncho, que los vi l’otru día nel Puelles Rock». Pero daquella pudo más la dexadez y el chume; anque la cosa camudaría.
Aprovechando qu’otru collaciu tenía casa en Xivares, fuimos unos cuantos a esa Nueche Celta de Candás na que Skama la Rede presentaba’l discu La Nuesa Hestoria. Mercámoslu esi día y convirtióse en banda sonora de la nuestra adolescencia. Tamién pasaron munches anécdotes; “coses de la edá” que queden nel recuerdu de “la nuesa hestoria” vital.
A les poques selmanes d’aquella Nueche Celta, volvíemos tres collacios a Candás pa dir a la nuestra primer Xunta Nacional de Darréu, organización na qu’entamábemos a militar. Gracies a eso conocí personalmente a los componentes de Skama la Rede nos camerinos de la sala Quattro d’Avilés cuando’l conciertu Asturies Nun Escaez 2005. Otru día, taba tomando unos culetes con ún de los cabezaleros de Darréu y díxome una frase que me marcaría pa siempre opinando sobre lo que facíemos Ásperos, el mio grupu de música d’aquella. Foi dalgo asina como: «Vosotros tenéis que distinguivos d’otros grupos punk-rock de Valencia o de Castiella; nun podéis falar siempre de les mesmes coses porque tenemos realidaes propies. Tenéis que facer como Skama la Rede, que fala de lo qu’otros nun falen, de lo d’equí, como cuando faen un cantar sobre la Banda Gaites de Villaviciosa». Foi una llección sobre lo que ye tener visión de país y analizar el mundu con perspectiva asturiana.
«Vosotros tenéis que distinguivos d’otros grupos punk-rock de Valencia o de Castiella; nun podéis falar siempre de les mesmes coses porque tenemos realidaes propies. Tenéis que facer como Skama la Rede, que fala de lo qu’otros nun falen, de lo d’equí, como cuando faen un cantar sobre la Banda Gaites de Villaviciosa»
Nún de los milenta conciertos de Skama, mentanto tocaben esi himnu que ye “Internacionalista” y cantábemosla puñu n’altu, un collaciu de los CMC (mocedaes del PCPE) comentó con ironía: «los nacionalistes cantando internacionalista». La frase resumía perbién la incomprensión de la izquierda española hacia’l soberanismu d’izquierda y les rencielles ente organizaciones polítiques de la izquierda alternativa. Sicasí, ellí taben, esfrutando de la música d’aquellos nacionaliegos que, como’l marxista y independista irlandés James Connolly (1868-1916), teníen conciencia de clase; pero tamién pertenecíen a una patria oprimida.
Tocamos xuntos per primer vez nel Puelles Rock de 2005 y seríen munches les vegaes qu’Ásperos y Fala Non Caduca compartiríemos escenariu con ellos. Siempre con bon rollu, respetu, apoyu y camaradería; ún de los rasgos de lo que foi y ye la escena de rock astur. Amás d’eso, compartimos munchos conciertos embaxo l’escenariu, porque enxamás me dixeron que «non» a les más de diez vegaes que los llamé pa tocar per Asturies o Euskal Herria nestes dos décades. Siempre tuvimos ehí, echándonos un gabitu conxuntu, medrando a comuña… y un exemplu recién d’esta rellación ye que’l día que fueron de fartura pa festexar el so 20 aniversariu, vinieron llueu al conciertu X+I Aniversariu d’Ixuxú. Nél dexaron buelga de la so personalidá colectiva y el so carismáticu hooliganismu, otres de les señes d’identidá poles qu’hai que querelos.
«La frase resumía perbién incomprensión de la izquierda española hacia’l soberanismu d’izquierda y les rencielles ente organizaciones polítiques de la izquierda alternativa. Sicasí, ellí taben, esfrutando de la música d’aquellos nacionaliegos que, como’l marxista y independista irlandés James Connolly (1868-1916), teníen conciencia de clase; pero tamién pertenecíen a una patria oprimida»
Dempués de facer memoria, pueo dicir qu’ensin Skama la Rede la mio vida político-musical nun sería igual. Y toi seguru que tamién la de muncha otra xente de la mio xeneración. Con ellos medramos, baillamos pogu, ficimos amistaes, militamos, deprendimos, garramos conciencia y discursu, compartimos milenta momentos. Tamién son parte d’esto otros nomes míticos del rock astur como Dixebra, Skontra y La Tarrancha; pero Skama la Rede sónlo con unes particularidaes que paga la pena sorrayar.
«Ensin Skama la Rede la mio vida político-musical nun sería igual. Y toi seguru que tamién la de muncha otra xente de la mio xeneración. Con ellos medramos, baillamos pogu, ficimos amistaes, militamos, deprendimos, garramos conciencia y discursu, compartimos milenta momentos»
Per un llau, la ideoloxía esplícitamente “nacionaliega”. A diferencia d’otros grupos del rock n’ast, Skama son marcadamente soberanistes d’izquierda; tanto nes lletres, como na estética, como nos discursos enriba d’un escenariu. Son esi grupu que «fala de les coses d’equí» y que tienen siempre na boca un «¡Puxa Asturies Dixebrá!», siendo a la par internacionalistes y solidarizándose con otres causes globales. Podría pensase qu’esto zarraría-yos puertes -por mor de la falta de conciencia nacional qu’hai n’Asturies-, pero supunxo tolo contrario. Calteniéndose fieles a la so ideoloxía y al so discursu, Skama la Rede foi per muncho tiempu’l grupu que más trescendió y conciertos dio d’esa xeneración de rock astur. Y eso de xuru qu’influyó n’asturianizar les conciencies de muncha xente. Per otru llau, tamién definiólos la constancia. Mientres qu’otres bandes viéronse afectaes pola emigración de los sos componentes y los cambios de formación; Skama caltuvieron un camín menos abegosu, con una actividá discográfica intensa nos sos diez primeros años de trayectoria. Hasta 2014, añu nel que publicaron el so anterior discu, Avante, y nel qu’entamaríen a camudar coses a nivel social y musical.
En 2014 vivimos la última fuelga xeneral; dos años enantes fueron les últimes griesques mineres; y cinco enantes veíemos zarrar Naval Gijón. Con ello, amenorgó’l pesu del movimientu obreru dientro la sociedá asturiana. Esi 2014 tamién desagospiaron el CSOA La Madreña y les grandes movilizaciones contra los recortes y la crisis capitalista baxaben d’intensidá. La sociedá diba camudando daqué y esto notóse tamién ente adolescentes que yá nun tendríen los mesmos referentes, gustos y vivencies que les xeneraciones anteriores. A la mocedá “alternativo” de 1984 y 2004 uníanos l’interés poles lluches obreres, pol punk, pol rock y compartimos una serie d’himnos que dieron forma a la nuestra identidá. Güei, la poca mocedá qu’hai n’Asturies tien munches característiques estremaes de la nuestra.
«A la mocedá “alternativo” de 1984 y 2004 uníanos l’interés poles lluches obreres, pol punk, pol rock y compartimos una serie d’himnos que dieron forma a la nuestra identidá. Güei, la poca mocedá qu’hai n’Asturies tien munches característiques estremaes de la nuestra»
Sicasí, que nun nos puea la señaldá. Ye verdá que yá nun surden grupos nuevos de rock astur, que ye bien raro ver a dalguien menor de venti años nun conciertu d’esti estilu, y que nuna manifestación del Primeru de Mayu rescamplen les canes. Pero per otru llau, les manis del 8 de Marzu son muncho más masives, yá nun hai que dar tantes batalles pa que’l cartelu d’una movilización tea n’asturianu y hai mocedá que sigue dando un pasu alantre nel compromisu de militar na izquierda asturianista. Too ello, pesie a que güei llamentemos que nun haiga n’Asturies grupos que faigan estilos que-y presten a adolescentes d’anguaño -como’l reggaeton, trap o pop electrónicu- dende una visión asturiana y d’izquierda; y que con esi llabor puean caltener la llinia trazada qu’enantes percorrieron Nuberu, Dixebra, Skama la Rede o K-Nalón, ente munchos otros.
«Agora les manis del 8 de Marzu son muncho más masives, yá nun hai que dar tantes batalles pa que’l cartelu d’una movilización tea n’asturianu y hai mocedá que sigue dando un pasu alantre nel compromisu de militar na izquierda asturianista. Nestos 20 años hubo evidentes cambios sociales, pero sigue habiendo resistencia, llucha y solidaridá. Y Skama la Rede tuvieron, tán y van siguir tando ehí, cantándo-y al movimientu d’esti pueblu»
A la fin, nestos 20 años hubo evidentes cambios sociales, pero sigue habiendo resistencia, llucha y solidaridá. Y Skama la Rede tuvieron, tán y van siguir tando ehí, cantándo-y al movimientu d’esti pueblu y marcando a una xeneración que medra al so llau. Milenta gracies.
Suscríbite a les nuestres novedaes
