Ta acabante d’anunciase un festival nuevu n’Asturies, el Madreñazu Fest. El pueblu casín de Pendones va acoyer los díes 1, 2 y 3 de mayu esti eventu que tien como filosofía’l reivindicar la cultura de la madreña. D’esta manera, va haber un espaciu destináu a artesanos madreñeros que van tar trabayando en vivo y, xunto a ellos, encadármase una programación na qu’hai graffiti, esposiciones, recreaciones históriques y los conciertos de Rellume, Los Collaínos y Cuévano, ente otres actividaes.
«Nel corazón de Casu, ente montes y tradición, vamos xuntanos pa celebrar la música, la cultura y l’arguyu de lo nueso. Un finde pa disfrutar, pa bailar y pa sentir Asturies bien dientro», anunció nes sos redes esti festival entamáu pola iniciativa Pendoneando. El so responsable, Iván Testón, desplica que nel eventu unos grafiteros van «facer varios murales pelos portones del pueblu nos que se va representar el procesu de fabricación de la madreña«. Amás comenta que va haber una reacreación del taller de la madreña, que va acoyer «una esposición de Playmobil» y qu’esta nun ye la única recreación; va haber otra «de fugaos de Casu, al cargu de Sergio Cardín».
La música y el baille nun podíen faltar nesti festival pa tola familia que tamién convida a asistir en madreñes. D’esta manera, Testón avanza que «la nueche del vienres 1 toca Rellume y el sábadu 2 actúen Bandina Los Collaínos, Cuévano cola collaboración de varios miembros de la Banda Gaites El Gumial y hai una actuación sorpresa«. Nos próximos díes la organización del Madreñazu Fest va dar más novedaes a traviés de les sos redes sociales d’una «primer edición que promete facer historia«.
Suscríbite a les nuestres novedaes
