Ta acabante de presentase a traviés de les redes sociales una nueva iniciativa pa puxar pola tradición, el patrimoniu cultural y el mundu rural. Trátase de Filmetrad, un proyectu impulsáu por Algamar Producciones y Ringo Rango que va desendolcase n’ochobre y qu’agora mesmo ta en fase de búsqueda de «documentales sobre folclore y tradiciones pa poder compartir y conocer otres cultures y otres maneres de vivir la identidá y la pertenencia a un pueblu«.
La música y el baille tradicional asturianu pueden tener espaciu nesti certame abiertu a otros territorios del mundu, que se presenta como «un espaciu d’alcuentru ente creación audiovisual, patrimoniu inmaterial y participación social«, que va desendolcase en dellos conceyos rurales d’Asturies y qu’entiende’l cine «non namás como una ferramienta d’exhibición, sinón como un dispositivu p’activar procesos de diálogu ente memoria, territoriu y contemporaneidá«.
D’esta manera, la programación va centrase en en documentales —curtimetraxes y llargometraxes— que traten al rodiu tradiciones, oficios, rituales, músiques y formes de vida venceyaes al patrimoniu cultural inmaterial. Hasta’l 15 de setiembre pueden inscribise propuestes na páxina web de Filmetrad pa participar nesti certame que va ufrir los siguientes premios: Meyor Película, Meyor Llargometraxe Documental, Meyor Curtiumetraxe Documental y Premiu del Públicu.
Con Filmetrad, afóndase nel llabor d’esparder con formatos nuevos los raigaños culturales del país y d’otros pueblos del mundu y Asturies posiciónase meyor nel planu internacional como un escenariu destacáu na reivindicación de les señes d’identidá.
Suscríbite a les nuestres novedaes
