La selmana pasada Llaboral Ciudá de la Cultura acoyó la tercer edición Música en Rede, un alcuentru profesional dedicáu a la industria musical asturiana entamáu pola Conseyería de Cultura, Política Llingüística y Deporte. Esti añu participaron más de 200 persones d’estremaos perfiles: programadores culturales, intérpretes, xestores, instituciones, profesoráu… de dientro y de fuera d’Asturies.
Precisamente, la internacionalización de la música asturiana protagonizó esta edición gracies a dalgunes de les actividaes qu’hubo y a la presencia nel eventu de Donald Shaw, director artísticu del prestixosu festival Celtic Connections de Glasgow, que l’añu qu’entra va dedicar la so edición a Asturies por vez primera. Les oportunidaes pa que la industria sonora d’Asturies xenere negociu ye ún de los pegoyos de Música en Rede, pero esti alcuentru tamién va acullá de lo económico, y dedicó espaciu a cuestiones como la resquiebra de xéneru nesti sector, el cuidáu de la salú mental y física nel campu artísticu, la pedagoxía musical o la xestión de derechos d’autor.
La música n’asturianu, como tolos años, volvió a tener protagonismu. Asina ye como, ente los once showcases qu’hubo -qu’esti añu fixéronse n’espacios nuevos como les sales Albéniz y Acapulco de Xixón, o la Ilesia de La Llaboral-, actuaron los artistes d’esta escena Tania Pereira, La Ciudá nel Mar, Asturiana Mining Company, Rubén Alba Band, Entós y Rubén Bada. Amás, la conexón celta tuvo un papel cimeru col conciertu de la mítica banda escocesa Capercaillie, que punxo’l ramu a les xornaes con un conciertu d’altor nel Teatru de La Llaboral nel que collaboraron el gaiteru pernomáu gaiteru avilesín José Manuel Tejedor y la cantante Julia Tejedor. Les meyores qu’hai a cada edición, la dinamización que xenera dientro la escena y la medría de participantes, fai que Música en Rede vaya pasín a pasu consolidándose como una cita fundamental dientro la escena d’Asturies.
Suscríbite a les nuestres novedaes
