Tres del éxitu algamáu cola publicación de los sos dos primeros temes hai dos selmanes, Raigañu tornen güei con otru par de cantares nuevos: ‘Gaites nel Carrefour’ y ‘Paisanos mal fechos’, compilaos nun EP xunto a los temes yá asoleyaos. Nellos, esta banda recién creada d’agrofolk-rock amuesa la so cara más satírica y irónica, «apostando por una música que dende l’humor y la crítica, busca facer reflexonar ensin perder la esencia de lo que somos», como desplica Llarvi, vocalista y cabezaleru del grupu.
«‘Gaites nel Carrefour’ ye un cantar que surde d’una imaxe tan absurda como significativa: un paisanu que va mercar y al entrar nel supermercáu, topa unes gaites nel pasiellu ferramientes. Esa escena fai que s’escaeza dafechu de la compra. Tres d’esa hestoria hai una sátira clara: la manera na que, ensin decatanos, vamos dexando de llau lo que ye nuestro, la nuesa cultura y les nueses tradiciones, en favor d’otres qu’entiendo que creemos sentir más cercanes o más útiles nel día a día por motivos que desconozo». Desplica’l cantante de Raigañu sobre esti tema que «ye una mirada crítica, pero tamién con un puntu de tristura, al ver cómo munches vegaes nun somos nin nós mesmos quien demandamos aquello que nos representa como país».
L’otru tema ye ‘Paisanos mal fechos’, que tien la collaboración a les voces y coros de Pelayo Gallego, Pablo Cubatas y Eduardo Riol, componentes de Trujas, grupu onde Llarvi tocó. «Esti cantar muévese tamién nel terrén de la sátira, pero con una mirada puesta nos cambeos que vivió Asturies —y sobre manera les zones rurales— nos últimos años. Fala de cómo, en mui poco tiempu, cambiaron los vezos, les costumes y la manera de vivir. Los pueblos fueron perdiendo xente y con ello non namás población, sinón tamién parte de la so identidá«, desplica’l músicu esclariando que trabayen el tema «dende lo absurdo y dende la comedia, pero’l tresfondu ye esi».
«La respuesta sorprendiónos fondamente. En namás 13 díes, los dos primeros cancios que saquemos, ‘Llingua de Paletos’ y ‘Fala con to güela’, algamaron alredor de 3.000 visites en Spotify. Una cifra que supera con muncho lo que podíemos imaxinar y que nos anima a siguir creando y compartiendo», valora’l fundador de Raigañu sobre l’acoyida del so estrenu d’hai dos selmanes. Amás, el grupu asoleyó nesti tiempu cinco videos nel so Instagram que tienen más de 123.000 reproducciones, lo qu’amuesa l’interés qu’esta banda nueva ta xenerando ente’l públicu.
L’orixe de raigañu remóntase a payares del pasáu añu, anque nun foi hasta febreru d’esti cuando completaron la formación. Musicalmente’l grupu presenta una propuesta orixinal, qu’amesta folk y punk-rock con muncho protagonismu de los vientos, mesmo de la gaita asturiana como de los vientos metales. A too ello súmen-y la estaya «agro«, por mor de que tolos sos componentes vienen del rural, un mundu que reivindiquen y al que miren nes sos lletres.
El próximu 20 de mayu tienen intención de llanzar el so primer discu y llueu entamar colos conciertos: 28 de mayu la presentación del álbum na Chalana (Llaviana), 12 de xunu en Blimea, 27 de xunu en Suares (Bimenes) y otres feches que tán zarrando. Con Raigañu medra la escena de rock n’asturianu gracies a una banda que sigue’l camín de referentes comoLos Berrones, Avientu, Spanta la Xente o Skama la Rede y presenta una propuesta a mediu camín ente toos ellos.
Suscríbite a les nuestres novedaes
