Esti fin de selmana ye la esperada primer puesta n’escena de Manual de Belleza, la nueva referencia discográfica de Rodrigo Cuevas. El «ministru de verbenes» va enllenar el Pabellón de La Magdalena d’Avilés colos conciertos d’esti vienres y sábadu p’abrir «una xira que va llevar la fantasía escénica y conceptual más increíble» de la trayectoria del músicu . Pero l’actividá nun queda ehí; el llunes 27 va tar firmando discos na Fnac de Parque Principado y el martes 28 na tienda de discos Alta Fidelidad d’Uviéu.
«Esti discu féciose dende la necesidá de crear utopíes horizóntiques que mos fagan baxar los pies a la tierra, y mos fagan entender y dixebrar lo importante de lo prescindible«. Son les pallabres coles que Rodrigo Cuevas entama los agradecimientos nel llibretu del so álbum nuevu, Manual de Belleza, qu’asoleyó’l pasáu 20 de marzu en CD, en vinilu y en toles plataformes musicales. El «ministru de verbenes» regresa dempués de trés años con diez cantares onde l’amor, la utopía, l’autoestima, la llibertá y la diversión marquen el ritmu y el tonu de la obra más distinta d’esti artista.
Manual de Belleza entama con esa declaración d’intenciones que ye ‘Un mundo feliz’, el primer de los adelantos del discu y nel que collabora Massiel, reina del pop español que Cuevas reivindica y qu’algamó a poner delantre d’un micrófonu dempués de qu’ella llevara venti años retirada. Primera utopía baxada a tierra. Síguen-y otros nueve temes nos que pue sentise una bayura d’estilos que van dende’l rap de ‘BLZA’ -nel que collabora la mítica rapera Mala Rodríguez y nel que se nota la mano del so compositor, l’ex Calle 13 Eduardo Cabra-, al boleru de ‘Xardineru’, pasando pel postpunk de ‘Una muerte ideal’, el tradi-tune deprendíu de Concha i Clara de Tresmonte ‘La hermana cautiva’, o’l mamarrachéu discotequeru de ‘La Playa’ y ‘Asturcón’. Too ello ensin escaecer la presencia de la música tradicional peninsular -‘Sácame a bailar’, ‘El pañuelín’ y ‘La fiesta’-, que lleva acompañando a esti artista dende Manual de Cortejo y que nesti discu cortexa con influencies d’otros estilos y una producción actual.
Y si l’álbum arranca cola utopía cantada de ‘Un mundo feliz’, les demás lletres siguen esa llinia na que se canta a la guapura de la vida. Too ello entemeciendo castellanu, amestáu y asturianu, llingua esta última que ta más presente que nunca nun discu d’esti carbayón nacionalizáu piloñés. Con Manual de Belleza Rodrigo Cuevas presenta la so cara más versátil y llibre, onde la utopía fai que s’alloñe d’encorsetase na tradición y, ensin escaecela, baille con otros estilos y seya quien a llevar a la música n’asturianu per caleyes nueves.
Semeya de Nay Seyema.
Suscríbite a les nuestres novedaes
