Hai dos meses presentóse públicamente Raigañu, un grupu nuevu que, col so estilu autodefiníu como «agro-folk-rock», traxo aire nuevo a la escena de la música asturiana. Dende aquella fueron adulces asoleyando dellos de los temes que diben formar parte del so primer discu, Fala con to güela. Güei llancen trabayu completu incorporando los dos últimos temes qu’entá nun publicaren: una versión de ‘La Capitana’ de Carlos Rubiera -que tien la collaboración del míticu cantante- y ‘Pensé que Quería’. Tamién continúen una xira qu’entamó’l pasáu 29 de mayu en Llaviana y que tien cinco conciertos confirmaos per delantre. Llarvi Varela, vocalista del grupu, cunta dalgunes de les cuestiones que caractericen al trabayu,
Fala con to güela yá ta publicáu al completu. ¿Qué pue sentise nos dos temes qu’entá nun asoleyaréis?
Nesta ocasión presentamos dos cancios bien distintos ente sí: ‘La Capitana’ y ‘Pensé que Quería’. ‘La Capitana’ ye un cantar de Carlos Rubiera, ún d’esos himnos que formen parte de la memoria colectiva d’Asturies. Probablemente estropiémoslu un poco col nuesu estilu, pero precisamente esa yera la intención: rindir homenaxe a cancios que formen parte de la nuesa tierra y llevalos al terrén de Raigañu. Amás, tuviemos la suerte de cuntar cola participación del propiu Carlos Rubiera. Muncha xente piensa que ye un cantar popular, pero detrás hai un autor fundamental de la música asturiana. Dende’l primer momentu dionos toles facilidaes del mundu y eso, pa una banda que prácticamente acaba de nacer, foi daqué mui especial.
Pela otra parte, ‘Pensé que Quería’ ye un cantar satíricu que fala de trés personaxes bien conocíos del panorama estatal: Julio Iglesias, Dani Alves y Íñigo Errejón. Dende’l tonu humorísticu y la tontería aparente intentamos tratar un tema que, en realidá, ye bastante más seriu. Ye una muestra de la filosofía que tamién ta presente en bona parte del discu.
Llama l’atención esta versión punk-rock-folk de ‘La Capitana’. ¿Cómo vois dio por facela, cómo surdió la collaboración con Carlos Rubiera y cómo foi’l procesu?
‘La Capitana’ ye un cantar que siempre me prestó dende guah.e. Cada vez que garraba una guitarra acababa cantándolu y nun conozo a naide que nun-y guste sentilu. Ye verdá que yá foi versionáu munches veces, pero tenía ganes de tenelu nel repertoriu de Raigañu. Comentémoslu ente toos y llegamos a la conclusión de que podíemos lleválu al nuesu terrén, especialmente añadiendo partes instrumentales que nel directu podíen dar muncho xuegu.
Lo primero que fice foi contactar con Carlos Rubiera pa pidir permisu. Personalmente nun me presta grabar nin versionar cancios ensin que l’autor lo sepa y dea’l vistu bonu. Falando con él, la cosa foi creciendo pasín a pasu hasta que nos prestó a dambos que participara nel proyectu. Pa nós foi un auténticu privilexu. Dende esi momentu fueron too facilidaes pola so parte y creemos que’l resultáu final quedó mui prestosu. De fecho la so voz grabose ehí n’Almastur.
«’Pensé que Quería’ ye un cantar satíricu que fala de trés personaxes bien conocíos del panorama estatal: Julio Iglesias, Dani Alves y Íñigo Errejón. Dende’l tonu humorísticu y la tontería aparente intentamos tratar un tema que, en realidá, ye bastante más seriu»
Agora que yá ta’l discu completu, ¿cómo presentaríes el trabayu nel so conxuntu?
La verdá ye que tardemos más de lo que pensábemos, pero por fin el discu ta termináu. Tamos mui contentos col resultáu, anque como-y pasa a cualquier grupu, hai coses que col tiempu seguramente cambiaríemos. Foi un procesu llargu y duru. Hai munchos instrumentos, munchos arreglos y munches hores de trabayu detrás. Amás, nós somos amateurs y tuvimos que deprender munches coses pel camín.
Dende’l principiu la idea de Raigañu foi crear una propuesta onde los vientos tuvieren un papel protagonista. Queríemos que formaren parte de la identidá sonora del grupu y creemos que, nel resultáu final, esa intención quedó reflexada. Tamién quiximos dar importancia a la sátira y a la ironía nes lletres. Prestábanos facer cancios que fixeren pensar, pero tamién que fixeren sorrir y pasar un bon ratu. Eso alterna con otros temes más serios o emocionales, dando variedá al discu.
Yá distis el primer conciertu. ¿Qué tal foi?
Foi espectacular. Hebo muncha más xente de la que podíamos esperar y acabó convirtiéndose nuna auténtica fiesta. Dempués de tolos meses de grabación y trabayu, esi conciertu foi una especie de desfogue y celebración. Amás, tuvimos la suerte de compartir escenariu con artistes y amigos que collaboraron con nós na presentación del discu: Tante, de Stroza y ex de Los Berrones; Rico, de Koordinaos; Cristian, de Rock’n’Bolescos; Riol y Pelayo, de Los Trujas; Jonás, de Skalón; y Manu, de Barredos, cola gaita. Más qu’un conciertu foi una reunión d’amigos celebrando que’l discu yá ye una realidá.
«Dende’l principiu la idea de Raigañu foi crear una propuesta onde los vientos tuvieren un papel protagonista. Creemos que, nel resultáu final, esa intención quedó reflexada. Tamién quiximos dar importancia a la sátira y a la ironía nes lletres»
La vuestra música ta teniendo mui bona acoyida en plataformes musicales, pa ser d’un proyectu nuevu.
Lo primero ye agradecer l’acoyida que tamos teniendo. Llegamos a tener picos de más de 3.000 oyentes mensuales en Spotify, una cifra que sinceramente nunca suañáramos cuando entamemos con esti proyectu. Sabemos que detrás d’eso hai muncha xente compartiendo los cancios, recomendando’l grupu y ayudándonos de milenta maneres distintes. Pa una banda pequeña como la nuestra eso ye fundamental y nun podemos tar más agradecíos.
¿Dalgo más que queráis destacar?
Agora toca defender el discu nos escenarios. Güei tamos en Blimea, mañana en Verdiciu, el día 23 compartimos escenariu con Dixebra en Llaviana y el 27 tamos na Folixa de Suares, en Bimenes. Lo que más nos presta agora mesmo ye salir a tocar y compartir estos cantares cola xente.
Suscríbite a les nuestres novedaes
