La inauguración de Talleres del Conde, en Llangréu, va tener na música en directo unu de los sos grandes reclamos, con una programación qu’e mestura’entemez raigañu, identidá y nueves formes d’espresión. Dientro d’esti cartelu sobresalen trés propuestes que marquen el tonu del eventu: Marisa Valle Roso, Gaiteros del Carbón y Girls to the Front.
La presencia de Marisa Valle Roso ye, ensin dulda, unu de los momentos más destacaos. La cantante llangreana lleva años consolidándose como una de les voces más potentes de la música asturiana contemporánea, combinando la tonada cola electrónica y el pop con una sensibilidá mui marcada.
Tamién va tener un papel central la actuación de Gaiteros del Carbón, una formación que representa como pocos el soníu de les cuenques. La so música, fondamente enraigonada na tradición asturiana, recupera l’espíritu de la cultura popular y del pasáu mineru, convirtiéndose nun elementu clave pa entender la identidá del territoriu.
Nel otru estremu estilísticu atópase Girls to the Front, una propuesta que trae al escenariu una mirada actual y reivindicativa. El proyectu, enfocáu en dar visibilidá a les muyeres na música, destaca pola so enerxía y pol mensaxe feminista, alineáu coles nueves corrientes culturales. Magar de que nun canten n’asturianu, na banda toquen delles artistes venceyaes a la música n’asturianu, como Mapi Quintana, Alicia Álvarez, Sil Fernández o Eva Toca.
El restu de la programación musical complétase con nomes como La Viuda de Angelín, Johnny Penicilina y Los Frixuelos Eléctricos, Cassettres, Regodones, Phoenix CVLT, Malvis o Samu Nahasa, conformando un cartelu variáu que busca atraer públicos diversos y amosar la riqueza de la escena musical asturiana actual.
La inauguración de Talleres del Conde va celebrase los díes 17 y 18 de xunetu en Llangréu, con una programación que s’estenderá a lo llargo de tol día y parte de la nueche. Los conciertos van desenvolvese principalmente en horariu de tarde-nueche, convirtiéndose nel epicentru musical del eventu, anque l’actividá va entamar dende primeres hores con propuestes pa tolos públicos, incluyendo actividaes infantiles, mercáu d’artesanía y zona gastronómica con foodtrucks.
Suscríbite a les nuestres novedaes
