El Puertu Marabio, nel conceyu de Teberga, acueye esti domingu 19 de xunetu una edición nueva de la tradicional romería de Santana, una cita qu’entemez música asturiana, gastronomía y tradición nun entornu privilexáu de la montaña asturiana. Nesta edición hai conciertos de Xuacu Amieva & Dobra y Carlos Velasco y Chino El Indio, amás d’otres actividaes como l’amuesa de pastoréu con perros, misa, corderada y verbena.
La estaya musical arranca a les 14h cola actuación del míticu gaiteru Xuacu Amieva, acompañáu del so grupu folk Dobra. Llueu ye la corderada popular, pa la que ye imprescindible facer reserva previa na Taberna Narciso, una de les impulsores de la iniciativa. Les actividaes rellacionaes cola música’l país acaben a les 18h con una sesión dedicada a la canción asturiana, de la mano de Carlos Velasco, ganador del Premiu Obdulia Álvarez «La Busdonga» d’Asturianada, xunto a Chino el Indio, cabezaleru de Mota Blues y dambos componentes amás del grupu folk Cuévano.
La romería de Santana vuelve asina a convertise nun puntu d’alcuentru popular qu’apuesta por una programación que pon en valor la música tradicional asturiana nún de los enclaves más singulares de Teberga.
Suscríbite a les nuestres novedaes
