«Una xornada festiva pa defender la paz, la soldaridá, el cuidáu del mediu ambiente y la multiculturalidá«. Esos son los oxetivos de la Folixa Pola Paz, cita organizada por CODOPA, Acción en Red Asturias, el Conseyu de Mocedá de Xixón (CMX), el Conseyu de Mocedá del Principáu d’Asturies (CMPA) y Ecoloxistes n’Aición que lleva celebrándose dende’l 2015 en Xixón. Nella hai una montonera d’actividaes, ente les que la música’l país tien el so espaciu.
La edición d’esti añu celébrase’l domingu 26 de xunetu dende les 12 la mañana nel Muséu del Pueblu d’Asturies y Pau Santirso & María Vázquez y Soi Panderetera van poner a baillar a la xente col so repertoriu de música tradicional. L’actuación del dúu carbayón va ser a les 13h mientres que’l grupu femeninu surdíu a la calor de la Escuela de Música Tradicional La Quintana toca a les cuatro la tarde.
Amás d’esto, la programación complétenla pasucáis, talleres, cuntacuentos, xuegos, un conciertu de Tripe Malta, comida popular o actividaes pa la reciella, ente otres. L’eventu ye de baldre.
Suscríbite a les nuestres novedaes
