Hevia va celebrar el próximu 15 de mayu en Xixón un conciertu bien especial nel Teatru Xovellanos con motivu del 25 aniversariu del so Platinum Europe Award. Una cita na que’l gaiteru asturianu va tar arropáu por numberoses collaboraciones musicales enriba l’escenariu. El cartelu confirmáu inclúi a artistes de distintos estilos y xeneraciones, creando una nueche que promete ser unu de los eventos musicales destacaos de la primavera n’Asturies.
Esti reconocimientu, algamáu gracies al impactu del álbum Tierra de nadie, convirtió a Hevia nun referente mundial y abrió nuevos caminos pa la gaita, que dende entós empezó a sonar n’escenarios de tol mundu con una propuesta innovadora, abierta a la fusión y a los llinguaxes contemporáneos.
Ente les collaboraciones anunciaes tán la cantante Marisa Valle Roso, la intérprete Mari Luz Cristóbal Caunedo y la cantautora cubana Luba María Hevia. Tamién van participar los músicos Frankie Delgado (Beleño), Pau Santirso, María Vázquez y Ramón Prada.
Nel apartáu más tradicional van sumase la Banda Gaites Villa de Xixón y la Banda Gaites Candás, dos formaciones fundamentales dientro de la música folk asturiana. El conciertu va repasar los grandes éxitos de la trayectoria d’Hevia y va sirvir tamién pa celebrar la influencia internacional de la so música mientres estos 25 años.
Les últimes entraes tán disponibles calcando equí.
Suscríbite a les nuestres novedaes
