Discu ‘Travesaos pelos chigres’ (1992) de Pálidos Pilotos

Dixitalizamos el discu d'esti grupu pop-rock que tuvo n'activo a primeros de los 90 y que fueron una rareza musical na escena del país

Entregues

El documentu sonoru qu’asoleyamos agora nel AMCA trátase del discu de Pálidos Pilotos, proyectu pop-rock que tuvo n’activo a primeros de los 90 y que fueron una rareza musical na escena del país.

Surdíu en La Pola (Siero), Pálidos Pilotos foi un grupu de pop-rock con non munchu tiempu d’actividá, qu’a principios de los años 90 ufiertaron dellos conciertos. Facíen parte d’él músicos avezaos de la escena sonora del país naquel tiempu: Güelu Martínez ‘Morgan’ (principal compositor y guitarrista, formaría parte también de la banda folk-rock La Cigua), Flaco Menéndez (voz), Simón Brown (teclaos), Javi Gun (baxu) y Chema Fombona (batería).

En 1992, diben acuéyese a la llinia d’ayudes del Gobiernu d’Asturies destinaes a la producción discográfica en llingua asturiana, que daquella taba activa. D’esta miente, traduciríen les sos lletres al asturianu y grabaríen un repertoriu de siete temes, nos que despleguen el so soníu pop-rock compactu, nos que rescampla l’emplegu especial de les guitarres y los teclaos.

Depués d’unos cuantos conciertos y la publicación d’esti únicu trabayu discográficu abandonaríen l’actividá, quedando como una rareza musical na escena del país.