Esti vienres 4 y sábadu 5 de setiembre celébrase en L.luarca la tercer edición de La Favorita de Xuan Bello, festival d’arte, pallabra y territoriu que recueye manifestaciones artístiques como la poesía, música, performance, arquitectura efímera, danza y arte sonoro. La música asturiana va tar presente en dos de les sos actividaes: el pregón inaugural y un conciertu de flauta, gaita y pianu con recital de testos de Xuan Bello; too ello cola participación de Flavio R. Benito, músicu col collaboró’l fináu escritor en dellos proyectos.
«La intervención mía nel Festival de La Favorita va centrase nun homenaxe de la figura de Xuan Bello, a traviés de los distintos proyectos nos que participamos xuntos dende que grabáremos en 2004 el discu La Voz del Ríu. Dende aquella ficimos distintes coses; él seleccionaba poemes de la so obra y yo musicábalos pa gaita o pa distintos tipos de flautes, asina que voi facer música sobre la so poesía», desplica Flavio R. Benito sobre la estaya musical de La Favorita. Nella va interpretar dalgunos de los poemes grabaos nesti discu, amás de dalgún inéditu, con música nueva compuesta sobre la última obra publicada del pernomáu escritor, El llibru futuru. Pa ello va tar tamién acompañáu del pianista Óscar Camacho y de Milio’l del Nido, que va recitar los testos.
«Amás d’esti homenaxe a la poesía de Xuan, tamién va haber dalgunes coses de música tradicional revisada. Hai una mirada a distintes músiques, sobre manera de la zona de L.luarca; un homenaxe a les músiques del país de tradición oral, vistes dende la perspectiva d’un gaiteru del sieglu XXI«, añade Flavio R. Benito. Too ello desendólcase con entrada llibre ente les places del Carmen y Severo Ochoa de la capital l.luarquesa. El pregón inaugural va ser el vienres 4 y el conciertu de gaita, flauta y pianu el sábadu 5.
Cola edición d’esti añu, La Favorita celébrase per tercer vegada consecutiva y, anque yá nun ta ente nós el so creador, el festival caltién el so espíritu orixinal: una programación artística multidisciplinar que pon en rellación el contestu de L.luarca y la cultura asturiana colo universal y el cruce de cultures, una de les idegues qu’atraviesen tola obra lliteraria de Xuan Bello. L’arquitectu Alberto Morell; la compositora y música Claudia Vega; l’escritor y director de escena Fernando Renjifo; y l’actor y xestor cultural Alberto Núñez son los comisarios y organizadores actuales d’esti festival qu’axunta nueve actividaes estremaes a lo llargo’l fin de selmana.
Na semeya, imaxe d’una obra conxunta de Flavio R. Benito y Xuan Bello
Suscríbite a les nuestres novedaes
