Dende esti xueves 3 hasta’l domingu 6 celébrase na capital maliaya la decimonovena edición del Festival Internacional de la Gaita (FIG), ún de los eventos más destacaos del calendariu musical asturianu. Conciertos folk, rock y d’asturianada, pasucáis, concursos, esposiciones, talleres, mercáu y otres actividaes gratuites van convertir mientres trés díes a Villaviciosa na capital de la música’l país nesti eventu entamáu pola Banda de Gaites Villaviciosa «El Gaitero», que tamién va celebrar nel FIG el so 40 aniversariu con un conciertu especial enllenu collaboraciones.
La xornada inaugural, el xueves 3, va empezar cola apertura de la esposición Canteros del Soníu – La Gaita de la Oliva, siguida de la charra y ruta didáctica sobre esti singular patrimoniu; el pasucais inaugural de la Banda de Gaites Villaviciosa «El Gaitero»; y el conciertu nel Teatru Riera del tríu bretón BEO, una formación integrada por Erwan Menguy, Yoann An Nedeleg y Martin Chapron. Esta actuación va entamar a les 21 hores, y la entrada va ser llibre hasta completar aforu. El broche d’oru d’esta primer xornada pondrála como vien siendo tradicional una jam session folk na Plaza de la Caleyina Les Indies.
El vienres 4 va ser l’apertura del Mercáu Tradicional que se va allugar n’El Pelambre y que va siguir a lo llargo de tol fin de selmana. Tamién va haber les actuaciones de la Bandina de la Banda Gaites Villaviciosa y de la Banda Gaites Camín de Fierro de Proaza, siguíes a les 19:30 de la proyección del documental Y agora que lu baillen los rapacinos. Lo llixero n’Asturies creáu pola agrupación etnográfica L’Andecha Folclor d’Uviéu. El vienres va acoyer tamién l’actuación de profesores y escolinos de la Escuela de Música Tradicional de la Banda Gaites Villaviciosa «El Gaitero«, rematando cola X Nueche en Danza, na que participa’l grupu mozu Rellume, la Orquestina La Xarangana y el dúu Ambás ya Ramsés, abriendo l’escenariu darréu a tol que s’anime a tocar.
El sábadu 5 va abrir la xornada’l taller prácticu Acompañamientu de canción asturiana cola gaita al cargu de los mayestros Rodrigo Joglar (gaita) y Lorena Corripio (voz), pal que va ser necesariu inscripción previa. Coincidendo cola Fiesta de la Sidra, nuevamente les agrupaciones de gaita convidaes -Xeremiers de Sa Marina de Llucmajor (Baleares), Banda Gaites Fonte Fuécara (Asturies), Banda de Gaitas Lembranza Solpor (Galicia), Banda Gaites Saxum (Asturies)- van animar la mañana en sucesivos desfiles, pero va ser a les 17 hores cuando va dar entamu’l pasucáis de toles bandes que precede al Alcuentru de Bandes de Gaites n’El Pelambre.
Ye nesti espaciu onde va facese tamién l’actuación especial de celebración del 40 aniversariu de la Banda Gaites Villaviciosa «El Gaitero«. La formación maliaya va dar un conciertu en compañía del grupu de baille Prau Llerón de Mieres de la banda gaites gallega Lembranza Solpor, de los grupos Rellume y Abéu y de los músicos Fabián Castro San José, Andrés García Álvarez, Carlos Castro, Adrián J. Argüelles y Javier Menéndez González. Estas actuaciones van tar precedíes, d’otru de los alcuentros habituales del FIG, nesti casu l’Alcuentru d’Artesanos de Instrumentos Musicales Tradicionales, que tien llugar de 16h a 21h.
La Nueche Folk zarra la xornada del sábadu coles actuaciones del Bagad Kemper, del pernomáu gaiteru José Manuel Tejedor y del míticu grupu de rock astur Dixebra. El domingu 6, últimu día del festival, va empezar cola Misa Asturiana de Gaita, siguíu del XVI Concursu de Gaiteros y Gaiteres «Memorial José Huerta«. La entrega de premios d’esti concursu, el mercáu tradicional, les actuaciones de bandines pelos chigres, desfiles de bandes de gaites peles cais o’l vermú gaiteru van dar continuidá a una xornada que remata cola presentación de la gaita asturiana de cámara del artesanu Iván González a les 17 hores y col VII Certame de Cantar Asturianu Xavi Solares, que va dar empiezu a les 18:30 hores con categoríes moza y adulta.
Amás, durante tol festival va poder vese na Casa de los Hevia la esposición Canteros del Soníu – La Gaita de la Oliva, que va cuntar cola reproducción de la gaita de la Ilesia de La Oliva, de la que ún de sos capitales figurativos inclúi la que se considera una de les primeres representaciones d’esti preséu na península ibérica. L’amuesa va averar al públicu la historia y el valor patrimonial de la emblemática gaita de La Oliva.
La XIX edición d’esti festival imprescindible complétala la banda sonora oficial del FIG 2026. Trátase de la ‘LLENÍN – Danza‘, tema del grupu mozu de música tradicional Abéu nel qu’andecha la propia Banda Gaites Villaviciosa «El Gaitero». Asina ye como dende mañana y hasta’l domingu la música asturiana va rellumar na capital maliaya, con un cartelu que cunta cola presencia de músicos y agrupaciones asturianes y internacionales, apostando tamién por formaciones moces y de nueva creación.
Suscríbite a les nuestres novedaes
