La Banda Gaites Villaviciosa «El Gaitero» y el Festival Internacional de la Gaita van recibir la Medaya de Villaviciosa, según anunció l’alcalde del conceyu, Alejandro Vega, mientres la celebración de la XIX edición del FIG.
L’anuncia tuvo llugar tres el conciertu especial col que la Banda Gaites Villaviciosa celebró los sos cuarenta años d’historia. El rexidor maliayu xubió al escenariu al finalizar l’actu pa felicitar a la formación pola so trayectoria y p’anunciar que va proponer al próximu Plenu municipal la concesión de la Medaya de Villaviciosa mesmo a la banda, mesmo al Festival Internacional de la Gaita.
La Banda Gaites Villaviciosa «El Gaitero», fundada en 1986, cumple esti añu cuatro décades de trayectoria, convertida nuna de les formaciones de referencia de la música tradicional asturiana. A lo llargo d’esti tiempu llevó’l nome de Villaviciosa y Asturies per escenarios d’España, Europa y América y acumuló diversos reconocimientos, amás de participar en cites internacionales como’l Festival Intercélticu de Lorient.
L’homenaxe llegó nun momentu especialmente simbólicu, coincidiendo cola celebración de la XIX edición del Festival Internacional de la Gaita, una cita que volvió convertir Villaviciosa nun puntu d’alcuentru pa la música tradicional, el folk y les cultures venceyaes al mundu de la gaita. La Banda celebró’l so aniversariu con un conciertu especial nel que contó con numberosos artistes convidaos y nel que les pieces tradicionales compartieron espaciu con propuestes contemporánees. L’actu acabó convirtiéndose nunu de los momentos más esperaos de la presente edición del FIG, con una respuesta especialmente cariñosa per parte del públicu.
Suscríbite a les nuestres novedaes
