Dende esti vienres 9 hasta’l domingu 11 celébrase en Mieres la XIII edición del Ochobre Folk, una de les cites más destacaes pa tola xente amante de la cultura tradicional. Esti eventu entamáu pol Grupu Folclóricu Prau Llerón col sofitu del Conceyu Mieres va axuntar alcuentros, baille, talleres, desfiles, conciertos, actividaes pa la reciella y xinta y bebida’l país. Too ello nel Parque Xovellanos y con una mayoría d’actividaes de baldre.
L’eventu va entamar el vienres 9 d’ochobre a les 19.00h col Alcuentru de bandines y pasucáis. Dempués d’una espicha a les 21h, hai Nueche en Danza cola Bandina La Villa El Gaitero, Fitiriteres, Bandina Los Collaínos, Otramiente y Bandina Os Montoxos.
El sábadu 10 arranca’l día col taller ‘Panderu Cuadráu y El Bail.le d’Arriba‘, que pon Maribel Parrondo. A les 12.00h, va haber actividaes pa la reciella y a les 13h un taller gratuitu de baille astur-llionés. Pela tarde, a partir de les 18h, hai desfile de grupos y alcuentru folclóricu, nel que participen el Grupu Folclóricu Prau Llerón, Banda Gaites El Gumial, el colectivu Xeitu de Llión y el Grupu de Baille Esbardu. A les 21h son los conciertos con Abéu, la banda berciana Los Trimendos y Dulzaro, artista pucelanu qu’entemez raigañu y tradición.
Pal domingu 11 a les 11.45h hai pintacares y yincana pa la reciella nel Parque Xovellanos y llueu, a les 13h, la DJ Killaphonía va facer una sesión p’animar el vermú del país y el bingu musical. Tola información y el contactu pa les reserves y los talleres puede alcontrase nes redes sociales de Prau Llerón y nel cartelu oficial d’un eventu que lleva siendo a lo llargo de trece ediciones una cita fundamental pa la música asturiana na Cuenca’l Caudal.
Suscríbite a les nuestres novedaes
