6 Riales ta de vuelta. La banda acaba de presentar ‘La neña Aida’, una nueva versión d’un cantar tradicional que llega acompañada d’un videu con una fuerte carga simbólica y emocional. El llanzamientu produzse’l 13 d’ochobre, coincidiendo col aniversariu de la muerte d’Aida de la Fuente, y marca l’entamu d’una nueva etapa pal grupu tres un cambéu de formación.
El cantar, recoyíu por Fernando de la Puente y venceyáu al repertoriu del grupu Xana de Perlora, llevaba tiempu formando parte del repertoriu de 6 Riales, anque nun yera una de les pieces más habituales nos sos conciertos, tradicionalmente más enfocaos al baille. Agora, la banda recupera’l cantar con nuevos arreglos y una interpretación anovada.
«Dímos-y una vueltina al cantar, que nun ye esactamente igual a como lu facíamos enantes», esplica Eli, integrante de 6 Riales. La banda reconoz que tovía ta trabayando pa completar el repertoriu de la nueva formación, pero quería dexar claro que’l proyectu sigue vivu y que la vuelta a los escenarios ta cada vez más cerca. «Queríemos mostrar a la xente que siguimos creando y que ceo taremos de nuevu dando guerra», señala Eli, que considera que nun había meyor ocasión pa facelo que nel aniversariu d’Aida de la Fuente.
La nueva versión llega acompañada d’un videu que va más allá de la interpretación musical y propón un percorríu visual pela memoria histórica asturiana, la llucha pola llibertá y el papel de les muyeres que s’enfrentaron a la represión.
Una de les particularidaes de la pieza audiovisual ye la presencia, al entamu y al final, d’un audio de la hermana d’Aida, cedíu por Ramón Lluis Bande. Un testimoniu que nun taba previstu nel planteamientu inicial del videu, pero que la banda consideró importante incorporar. «Anque nun yera la idea orixinal qu’entamara asina, creyemos que yera de xusticia ponelu», espliquen.
El videu nun sigue una narración cronolóxica convencional. Entama cola presencia d’una muyer que caltién recuerdos d’aquella época, ente ellos los d’Aida y una neña, pa depués treslladar la historia a un tiempu más actual, o a otru tiempu posible, ensin establecer una correlación temporal directa. D’esta manera, la pieza abre la puerta a distintes interpretaciones y conecta’l pasáu col presente. La historia d’Aida conviértese nun puntu de partida pa reflexonar sobre lo que puede pasa-y a la xente que llucha y canta pola llibertá.
El desenllaz vuelve al pueblu onde vive la protagonista de la historia, anque la banda prefier nun desvelar más detalles pa nun condicionar la esperiencia de quien vea’l videu. «Ye un videu que, anque cuenta una historia, la nuesa memoria histórica asturiana, en diferentes partes pue interpretase de diferentes maneres», apunta Eli. Una propuesta que combina un mensaxe claru con símbolos ya imáxenes que dexen espaciu pa la reflexón personal.
«La neña Aida» ye tamién una declaración d’intenciones. Dempués del cambéu de formación, 6 Riales escueye un cantar cargáu de significáu pa presentase de nuevu y reafitar la continuidá del proyectu. La banda tien claro que’l momentu actual pide alzar la voz. «La xente del pueblu nun podemos tar en silenciu, tenemos qu’alzar la voz», afirmen. Con ‘La neña Aida’, 6 Riales anuncia que sigue en marcha, presenta la nueva formación y reivindica, al mesmu tiempu, la música como ferramienta pa recordar, espresar y defender la llibertá.
Suscríbite a les nuestres novedaes
