El grupu de música y percusión tradicional 6 Riales anunció esti fin de selmana a traviés de les sos redes sociales un cambiu nuevu na so formación. Por «motivos personales y cambios d’estapa» Alba Menéndez y Elena Granda dexen la banda, anque los cuatro conciertos que tienen per delantre van dalos esti cuartetu al completu pa despidise «per tolo alto».
«Dende equí solo podemos desea-yos lo meyor», fueron les pallabres que les otres dos componentes de 6 Riales, Natalia Vega y Elisabeth Montequín, dedicaron a les sos compañeres, dándo-yos les «gracies de corazón per estos años».
D’otra banda confirmaron que «6 Riales sigue adelantre, cola mesma enerxía, cola mesma ilusión y embarcándonos nun proyectu nuevu, abriendo una etapa y zarrando asina un ciclu importante». «Cuando daqué termina, tamién naz daqué nuevo», añade 6 Riales nel so comunicáu que, con estos cambios, adelanta novedaes dientro de la escena de música tradicional.
Suscríbite a les nuestres novedaes
