Tres de dir avanzando confirmaciones dende hai unes selmanes, el festival Válgame Fest d’Arenas (Cabrales) anuncia’l cartelu completu de la so quinta edición. Nél va caltener la llinia pola que vien apostando dende’l so surdimimientu: conciertos de grupos folk y rock; actuaciones de bandines; charres y otres actividaes rellacionaes cola cultura de raigañu; pasacáis y mercáu artesanal. Les formaciones musicales que van tocar son Los Indianos de La Maleta al Agua, Bandina La Xarangana, Llevólu’l Sumiciu, Los Gascones, 6 Riales, Corquiéu, Ochobre y Los Vicentos.
Como ye vezu, esti festival entamáu pol Grupu Folclóricu Corri-Corri arranca’l primer fin de selmana de mayu con actividaes de calter cultural. A les 13h va celebrase la charra Camín de Cabrales, con Xosé Antón Ambás y Ramsés Ilesies nel Atenéu Cabraliegu. Pela tarde, a les 18h , va inaugurase la esposición Materia Viva de Carmen Bustillo Bernaldo de Quirós. La xornada zárrase a les 20h cola proyección de dos audiovisuales inéditos cola temática Cabrales y les sos xentes, realizaos por autores llocales, siguíos d’una mesa redonda con Alberto Pardo.
El vienres 8 de mayu’l protagonismu va ser pa la música y el baille’l país. Tanto dende la so perspectiva más tradicional, como dende la reinterpreación más contemporánea. Dende les 22.30h el parque d’Arenas va acoyer una Nueche en Danza coles bandines Los Indianos de La Maleta al Agua y La Xarangana. La fiesta va siguir cola actuación de Llevólu’l Sumiciu, pa rematar la nueche con música electrónica de raigañu.
El sábadu 9 va ser la xornada más intensa del festival. Dende les 11h hasta les 21h va haber un Mercáu d’Artesanía, acompañáu a les 13h por pasacáis de gaita. A les seis de la tarde van desenvolvese xuegos tradicionales asturianos, entamaos por 6 Conceyos y a les 19h vuelve la música cola bandina popular Los Gascones. Yá pela nueche aporten los conciertos principales: el grupu de música tradicional 6 Riales (22.30 h), la mítica banda folk Corquiéu (00:00 h) y la formación punk-rock-folk Ochobre (01.30 h).
El V Válgame Fest piésllase’l domingu 10 nel parque cola Bandina Los Vicentos a les 14h. Darréu, ente les 14.30 y les 15.00h, va celebrase una paellada popular, con venta previa de tiques. Con esta quinta edición, el Válgame Fest reafirma’l so compromisu cola cultura de raigañu y cola creación actual n’asturianu, convirtiendo a Cabrales nun escaparate de la vitalidá de la música asturiana nel oriente del país.
Suscríbite a les nuestres novedaes
