Entá nun acabó’l 2026, pero la temporada festivalera asturiana ta teniendo nos últimos años munchu puxu y cada vez son más los eventos qu’anuncien les sos feches con dellos meses d’antelación. Estos díes dos de los festivales con más sonadía del país avanzaron yá la celebración del 2027: el Válgame Fest de Cabrales y el Festival Internacional de la Gaita (FIG) de Villaviciosa.
El 1, 7, 8 y 9 de mayu Arenas (Cabrales) va acoyer la sesta edición del Válgame Fest. Esposiciones, charres, cantares de chigre, nueche en danza, mercáu, xuegos tradicionales, conciertos y paellada son les actividaes avanzaes pol Grupu Folclóricu Corri Corri -organizador del eventu- nel primer cartelu que yá presentaron, diseñáu por Carmen Bustillo de La Primavera Estudio. La organización destacó tamién qu’esti añu van facer un homenaxe a Pancho y Cundo, «Gaiteros de Llonín», y agradecen que la Declaración de Bien d’Interés Cultural de la Danza del Corri Corri, ye lo que fai posible que se celebre esti festival.
Per otru llau, la Banda Gaites Villaviciosa «El Gaitero» anunció tamién la que va ser la XX edición del Festival Internacional de la Gaita (FIG). La capital maliaya va celebrar esti eventu los díes 2, 3, 4 y 5 de setiembre de 2027. Charres, talleres, esposiciones, mercáu, concursos, folk, rock, asturianada… y otra montonera actividaes van dar forma ún de los eventos más destacaos pa la música de raigañu.
Suscríbite a les nuestres novedaes
