Yá queda menos pa la edición XIX del Festival Internacional de la Gaita (FIG) de Villaviciosa, que va celebrase na villa maliaya los díes 3, 4, 5 y 6 de setiembre. Dende la Banda Gaites Villaviciosa-El Gaitero, organizadora del eventu, yá tienen diseñada tola programación y esti vienres 17 de xunetu van facer la presentación pública con una actividá na que tamién hai música en vivo: actúen l’alumnáu de la so Escuela de Música Tradicional y Abéu y tamién hai Nueche en Danza con escenariu abiertu.
La xornada entama a les 20h nel Salón d’Actos del Atenéu Obreru de Villaviciosa, que ye onde componentes de la Banda Gaites Villaviciosa-El Gaitero van facer la presentación del programa del FIG. Llueu, pa les 21.30h la bolera del Atenéu conviértese nel escenariu pel que van pasar los escolinos y escolines de la EMT, Abéu a les 22h y se celebra la Nueche en Danza con escenariu abiertu a les 23h.
«La idea ye caltener la estructura de programación de los caberos años, combinando la variedá y la bayura de la cultura rellacionada cola gaita«, desplica David Muñiz, ún de los responsables del festival. Pa ello van siguir trabayando por abarcar «los ámbitos nos que ta presente la gaita, tanto de la música tradicional asturiana como del restu de gaites de la península ibérica y d’Europa«. Nesti sen van siguir programar «coses novedoses: grupos que lleven gaita que nun tuvieren enantes presentes n’Asturies o tipos d’agrupaciones o artistes que tengan instrumentos que tean rellacionaos cola gaita…».
Cola actividá d’esti vienres, el FIG activa la cuenta atrás de la XIX edición d’un festival referencial nel qu’hai tamién espaciu pa charres, talleres, esposiciones, mercáu, concursos, folk, rock, asturianada… y otra montonera actividaes.
Suscríbite a les nuestres novedaes
