«¿Cómo ye la realidá de les muyeres y les disidencies de xéneru na industria musical? ¿Qué desigualdaes caltiénense y qué ferramientes tenemos pa tresformar el sector?». Con estes entrugues como puntu de partida, MIM (Asociación de Mujeres de la Industria de la Música) presenta esta tarde, xueves 5 de payares, a les 19.30h en L’Espaciu de Puru Remangu / Musicasturiana.com de Xixón Cartografía, un estudiu qu’analiza la situación de les muyeres na industria musical nel ámbitu estatal y con unos datos que permiten tamién averase a la realidá asturiana.
La presentación va cuntar con Lara Alcázar, vocal de la xunta directiva de MIM y xefa de campañes en [PIAS], y Sandra Sienra, xestora de proyectos culturales y DJ. La sesión va servir p’averar los resultaos de la investigación al contestu llocal y xenerar un espaciu d’intercambiu al rodiu los desafíos qu’afronten les profesionales del sector.
Acullá de la presentación de los datos, la propuesta busca favorecer l’alcuentru ente profesionales, axentes culturales y persones interesaes na música y la igualdá. Tres de la esposición, va abrise un alderique pa compartir esperiencies, poner en común diagnósticos y charrar de les tresformaciones necesaries p’avanzar hacia una industria musical más xusta y igualitaria.
Averar esta investigación a Asturies supón tamién una oportunidá pa incorporar la perspectiva territorial al debate, reconocer les particularidaes del texíu musical llocal y fortalecer los espacios de diálogu y collaboración ente quienes trabayen nél.
Suscríbite a les nuestres novedaes
