La ciudá nel mar da esti sábadu’l conciertu especial presentación de ‘Les lluces primeres’

A les 19h l'Auditoriu de Grau acueye esti espectáculu de la banda indie-folk nel que va haber collaboraciones y "dalguna sorpresina"

El pasáu 16 d’ochobre La ciudá nel mar asoleyaron Les lluces primeres, el so primer álbum de llarga duración. Nel discu axunten 12 cantares y amuesen les distintes cares d’un proyectu que s’asitia ente la canción d’autora, l’indie, el folk y la música tradicional asturiana. Tres de facer dellos conciertos con él yá asoleyáu, esti sábadu 21 de payares van facer la presentación especial en directo nel Auditoriu de Grau. La cita ye a les 19.30h y con entrada llibre hasta escosar l’aforu.

«Vamos poder sentir tolos cantares del discu con collaboraciones de la xente que fizo con nós esti trabayu y tamién con dalguna sorpresina«, desplica Marina Pangua, vocalista, lletrista y percusionista del grupu. Asina ye como Diego Pangua, Siset, componentes de Muyeres, Merce Santos o’l Coru d’Amigos de La ciudá nel mar; son dalgunos de los nomes que van andechar col quintetu mozu. Xunto a ellos va haber sorpreses que’l grupu nun quier avanzar pa que’l públicu disfrute con tolo que lleven preparao «con muncho amor».

El llugar escoyíu pal conciertu tamién ye especial por dos razones. De la primera d’elles Pangua diz lo siguiente: «Nun somos nengún de Grau, pero Celia ye de Candamu, que ta yá rayando con Grau, y ta mui venceyada a esi conceyu; amás mio casa ta en Les Regueres y Grau ye la villa más cercana, asina que sí que tenemos raigañu; incluso tamién por antepasaos familiares». A esto súmase la segunda: «pero, sobre manera, porque nos acoyeren mui bien, porque apostaron por nós y amás ye un conceyu que tien munchísima riqueza de música y cultura tradicional y esto préstanos pola vida». D’esta manera ye como la villa moscona va consolidándose como un llugar afayadizu pal espoxigue de la música’l país y les presentaciones de novedaes discográfiques.

«Tamos mui contentos. Yá tuvimos que facer una segunda tirada porque la primera acabósenos y esti sábadu vamos tener a la venta los CDs y unes llámines que preparamos coles ilustraciones del discu, polo que va ser un bon momentu pa disfrutar cola música en directo y facese col trabayu», añade la cabezalera de La ciudá nel mar sobre esta presentación que define como «una fiesta de la música na que vamos compartir con tol que quiera lo que nós queremos y sabemos facer«.

Un discu qu’amplía posibilidaes

Con Les lluces primeres, La ciudá nel mar da un pasu importante nel so percorríu: el de convertir una propuesta que foi creciendo a partir de dellos cenciellos y un primer EP nuna obra de llargu formatu. La evolución de la banda nun pasa por abandonar les sos señes d’identidá, sinón por ampliar les posibilidaes del so soníu. Al nucleu formáu por Marina Pangua, Andrés García, Celia Nieto y Ángel ‘Tom’ Villa sumóse Olaya Llucía al baxu. La incorporación d’estos elementos, xunto al trabayu de producción de Sergio Rodríguez ‘Tutu’, permite abrir los arreglos a sonoridaes más eléctriques y a recursos electrónicos ensin dexar de llau’l componente folk.

La diversidá ye una de les claves del álbum. Marina Pangua yá adelantara que’l repertoriu combina temes animaos y cañeros con otros orientaos al baille y pieces más íntimes y reflexives. Esa amplitú resulta significativa nun grupu nel que la escritura ocupa un llugar central: los cantares nun se planteguen namás como exercicios d’estilu, sinón como espacios pa desenvolver imáxenes, narraciones y emociones dende una mirada propia.

Más allá de les etiquetes

Les lluces primeres presenta asina a La ciudá nel mar nun momentu de consolidación. El discu pon en xuegu la tradición y la esperimentación, la intimidá y la enerxía, la composición propia y la recuperación de formes musicales reconocibles. La so aportación al panorama asturianu ta precisamente nesa voluntá de nun escoyer ente raigañu y modernidá, sinón de facer que dambos elementos dialoguen dientro d’un repertoriu personal.

Marina Pangua define Les lluces primeres como un trabayu fechu con «munchu mimu», nel que La ciudá nel mar recueye’l resultáu d’un procesu creativu que lleva dellos años desenvolviéndose. La cantante y compositora recurre a la imaxe d’un árbol pa esplicar cómo foi creciendo’l proyectu: «Na raíz ta la música tradicional y tán les canciones que compongo, el tueru ye la nuestra fame d’esplorar lo que tenemos en nosotres, d’apurrir lo meyor que tenemos caún de los componentes».

D’esi procesu surdieron los doce cantares que conformen l’álbum, una obra que, según esplica Pangua, tien «too un imaxinariu propiu». La intención nun ye namás presentar una colección de composiciones, sinón proponer una esperiencia d’escucha que permita reparar nos matices y dedicar tiempu a la música: «Con él queremos invitar a parar, a posar. A escuchar con tolos sentíos».

Doce cantares qu’abren un camín nuevu pa la música d’Asturies

L’álbum abre con ‘Les señes del agua’, una de les canciones escoyíes como adelantu del llanzamientu. La pieza sirve pa presentar una de les llinies del proyectu: la voluntá d’ampliar el soníu del grupu al traviés d’arreglos más ambiciosos, y detalles instrumentales que conviven cola escritura de Marina Pangua. La composición foi presentada como una llamada a caltener la esencia propia y afrontar les dificultaes ensin perder el camín. La obertura de vocación épica refuercen esa intención d’espandir les posibilidaes sonores de La ciudá nel mar.

El segundu cantar, ‘Amores en torres firmes’, propón una aproximación distinta al repertoriu. La pieza combina una xota y una muñeira y recupera les cuartetes tradicionales como estructura pa la lletra. Frente a la espansión instrumental de ‘Les señes del agua’, esti cantar pon l’atención na relación directa cola música popular y les formes que siguen presentes na tradición asturiana. La escoyeta de dambos temes como adelantos permite entender dos de les direcciones del álbum: la busca de nueves testures y la recuperación de recursos tradicionales como material vivu pa la creación contemporánea.

El repertoriu sigue con ‘Aselar’, que cuenta cola participación de Diego Pangua; ‘La fiesta de les serpientes’, y ‘Lluminaria’, na que collabora Sergio Rodríguez. Más alantre apaez ‘Llaurel’, xunto al coru d’amigos de La ciudá nel mar, y ‘Adela’, con Siset, y onde destaca el soníu de la guitarra d’Andrés García. La presencia d’estes voces y collaboraciones forma parte del carácter colectivu que la banda quier dar al álbum. La segunda metá del discu continúa con ‘Siempre llibre’, ‘Cantu Llunada’, ‘Vuelta’ y ‘Foles ermes’, estes dos últimes col acompañamientu de Sergio Rodríguez. El percorríu zarra con ‘Nesti campu tuvo’l mar’, una pieza na que participen Muyeres y Merce Santos.

La dimensión visual tamién ocupa un llugar importante nel proyectu. El diseñu de Borja Cámara, responsable de treslladar al planu gráficu la esencia de la formación, completa la propuesta artística del álbum. La so trayectoria inclúi’l premiu al Meyor Diseñu d’Álbum nos premios de l’Academia Española de la Música pol trabayu Toda la vida, un día, de Silvia Pérez Cruz.

El discu zarra con una composición basada nun poema de Miguel Hernández traducíu al asturianu. Los versos escoyíos recuperen la imaxe d’un mar que desapaeció d’un paisaxe, pero que sigue presente na memoria de la tierra: «Nesti campu tuvo’l mar, dalguna vez volverá. Si dalguna vez una gota roza esti campu, esti campu siente’l recuerdu del mar. Dalguna vez volverá». Un final que conecta cola idea de memoria y pertenencia que traviesa l’imaxinariu del álbum y que devuelve al oyente a la relación ente la tierra, l’agua y el pasu del tiempu.

Llista d'espera Vamos informate cuando recibamos unidaes. Por favor déxanos embaxo una dirección válida de corréu electrónicu.