Yá ta en toles plataformes musicales ‘Amores en torres firmes‘, el single nuevu de La Ciudá nel Mar. Tres d’asoleyar el pasáu xunu un primer adelantu del so discu de llarga duración, la formación indie-folk torna agora col tema del álbum más influenciáu polos sones de raigañu, con una música formada por una xota y una muñeira y una lletra na que recueyen unes cuartetes tradicionales.
«Como l’anterior single, ‘Les señes del agua’, fuera de composición propia dafechu, mesmo la música como la lletra, escoyimos esti otru adelantu agora por amosar esa otra vertiente nuestra más folk, y porque tamién pue baillase«, desplica Marina Pangua, vocalista, guitarrista y percusionista del grupu. La tamién lletrista añade amás que les cuartetes que canta nesta lletra tienen «muncha fuercia, sobre manera les dos últimes de muñeira«, y que tamién ella escribió pal cantar daqué «a la manera de les cuartetes tradicionales».
El tema continúa’l camín qu’abrió La Ciudá nel Mar hai añu y picu; una propuesta qu’axunta pingarates pop, folk, rock, indie y canción d’autor y que’l 16 d’ochobre va amosar al completo lo qu’ufren cola publicación del so primer discu de llarga duración, que tamién van asoleyar en CD. El procuru pa coles lletres ye otra de les cuestiones que sorraya Pangua de la so banda; una formación que medró apocayá cola incorporación d’Olaya Llucía al baxu: «agora tenemos una baxista mui bona y vamos tener la opción d’usar programaciones enriba l’escenariu, porque ella yá ta trabayando muncho nesti tema».
En menos d’un mes va poder sentise’l resultáu de tou esti trabayu que’l quintentu rexistró nos Tutu Estudios de Corvera cola producción de Sergio Rodríguez. Mentanto, pue esperase sintiéndose esti adelantu de ‘Amores en torres firmes’ xunto a los llanzamientos que yá publicaron hasta’l momentu: l’EP Lluminaria, el single ‘La fiesta de les serpientes’ y l’anterior adelantu del discu, ‘Les señes del agua’.
Suscríbite a les nuestres novedaes
