La Ciudá nel Mar atópase inmersa nel procesu de grabación del que va ser el so primer discu de llarga duración, un trabayu que vien completar el camín entamáu col EP publicáu l’añu pasáu. Asina lo esplicó Marina Pangua, integrante del proyectu, que destaca’l momentu creativu nel que s’atopa la formación.
El nuevu álbum va recoyer un repertoriu ampliu y representativu del percorríu compositivu de Pangua, con cantares que van dende les sos primeres composiciones hasta pieces más recientes. “Hai un poquitín un camín de la mio producción como compositora de cantares”, señala, definiendo’l discu como una obra que reflexa evolución, memoria y presente creativu.
La grabación ta desenvolviéndose arrodiaos de músicos y colaboradores cercanos, nun ambiente de trabayu cuidáu y cómplice. Nel procesu tán participando Celia, Tom y Andrés, que tan aportando “munchu mimu” a los cantares. El resultáu va ser un discu variáu, con temes animaos y cañeros, otros pensaos pal baille y delles pieces más íntimes y reflexives, pensaes pa escuchar con atención.
A nivel sonoru, el trabayu amplía la instrumentación habitual del grupu —voz, vigulines y guitarra— incorporando baxu y batería. Anque’l nucleu creativu de La Ciudá nel Mar sigue siendo’l mesmu, el proyectu suma nuevos músicos pa los directos más eléctricos y de banda completa, reforzando asina la so dimensión escénica. El discu va cuntar amás con colaboraciones especiales, que por agora prefieren caltener en secretu, anque dende’l grupu adelanten que se trata de persones con una llarga trayectoria dientro de la música asturiana.
Mesmo que’l so primer EP, la grabación ta realizándose nos estudios Tutu, cola producción a cargu de Tutu, una figura de referencia na producción discográfica n’Asturies. El lanzamientu d’esti primer álbum supondrá un pasu decisivu na consolidación de La Ciudá nel Mar como una de les propuestes más personales y cuidaes del panorama musical asturianu actual.
Suscríbite a les nuestres novedaes
