Del 6 al 9 d’agostu Navia acueye una edición nueva del Festival de la Sidra Villa de Navia, eventu qu’axunta gastronomía y cultura nesta llocalidá del occidente asturianu. Como ye vezu dende hai unes ediciones, la organización apuesta por programar música asturiana qu’esti añu va sonar el sábadu 8 con Cantares de Chigre, música y baille tradicional, Abéu y La Güeriata.
L’actividá musical pa la mañana del sábadu dura de 12.30h a 14.45h y nella va haber cantares de chigre peles sidreríes de la villa animaos pol Ochote del Coru Villa de Navia, la banda de gaites La Reina’l Truébano y el grupu de baille tradicional Ramón de Campoamor.
Pa la nueche son Abéu y DJ La Güeriata quien va xubir al escenariu asitiáu na Dársena de Navia. El grupu mozu xixonés de música tradicional va llevar los sones del so discu nuevu K-MUDAR a esta villa a les 21h, mientes que la DJ de la Cuenca’l Nalón va pinchar los sones electrónicos y de músiques del mundu -ente les que suena la música asturiana- a les 22.30h.
Suscríbite a les nuestres novedaes
