«Camudar: Mudar pa caltener. Tresformar pa nun desapaecer«. La frase qu’acompaña al estuche del álbum ye toa una declaración d’intenciones de lo que pue sentise en K-MUDAR, el primer trabayu discográficu d’Abéu. El grupu estrenólu’l sábadu’l con un exitosu conciertu nel Auditoriu de Grau y yá ta a la venta na tienda online de musicasturiana.com, na so oficina de Xixón y nel puntu de venta que tien na tienda d’Uviéu de Puru Remangu. Amás, pue sentise en toles plataformes musicales.
K-MUDAR ta formáu por 13 pieces de música tradicional asturiana. Nél pueden sentise cantares de siega, xotes, muñeires, garruches, aguilandos, pericotes, rumbes, pasodobles y dances; a la fin, un fondu percorríu pelos sones del país, mesmo musicalmente como llingüísticamente, con lletres que reflexen les distintes variedaes dialectales de la llingua asturiana. Sicasí, el trabayu naz acordies a la filosofía del so nome, la de camudar, y asina ye como’l cuartetu reinterpreta les pieces pa ufrir lo que definen como «una interpretación actualizada de la música tradicional asturiana dende’l soníu que nos identifica».
D’esta manera ye como Paula Vega (voz y percusión), Óscar Vega (voz y percusión), María Blanco (voz y percusión) y Edu Llosa (guitarra) xueguen cola tradición pa llevala a otres sonoridaes, siempre enmarcándose dientro de la música tradicional y el folk acústicu. El discu grabóse nos Tutu Estudios de Corvera baxo la producción de Sergio Rodríguez y cunta con delles collaboraciones: Rellume ponen voces en ‘LUMBRÍA’; el Grupu Folklóricu Trebeyu andecha nos aguilandos ‘LA PICA’ y ‘LAS MURIAS’; Álvaro Esteso toca’l saxofón na rumba ‘JULIA’ y la Banda Gaites Villaviciosa arriquez la danza ‘LLENÍN’ coles sos gaites y sección de percusión.
El trabayu asoléyase nun digipack (escuche de cartón) qu’inclúi l’USB pa poder sentir los temes n’alta calidá y un llibretu de 26 páxines qu’inclúi les lletres y semeyes rellacionaes cola historia personal y musical de los y les componentes del grupu, venceyaos a la tradición sonora asturiana dende la cuna, como amuesen les imáxenes coles qu’homenaxeen tamién a la so familia.
Cola publicación de K-MUDAR, Abéu algama lo que lleva buscando dende los sos entamos en 2018, cuando cuatro adolescentes venceyaos al Grupu Folklóricu Trebeyu de Xixón crearon esta formación. D’entós pacá, fueron madurando la so propuesta y buscando un soníu personal que los identifique. Güei esi soníu ye una realidá que comparten col públicu nesti trabayu y nos directos que van siguir dando per dientro y fuera del país.
Suscríbite a les nuestres novedaes
