Yá ta a piques d’asoleyase K-MUDAR, l’esperáu primer discu d’Abéu. El cuartetu de música tradicional va presentalo en directo esti sábadu 16 de mayu a les 20h nel Teatru Auditoriu de Grau, nuna actuación na que van cuntar con collaboraciones, bailladores y sorpreses. El trabayu completu va poder sentise esti domingu 17 en toles plataformes musicales y mercase en musicasturiana.com.
«K-MUDAR ye un proyeutu que pretende ufiertar una interpretación actualizada de la música tradicional asturiana dende’l soníu que nos identifica y que llevamos definiendo dende la creación del grupu en 2018, dende lo que somos, xirando tou al rodiu del relevu xeneracional, nel que confiamos y al que queremos poner en valor», despliquen Abéu sobre’l so primer discu. La moza formación yá publicó trés adelantos del trabayu: ‘L.LIXEROS’, ‘AGUILANDOS‘ (nel que collaboren Trebeyu) y ‘LUMBRÍA‘, cola collaboración de Rellume.
«Va haber munches novedaes, collaboraciones y sorpreses», desplicó Paula Vega, una de les voces y percusionistes d’Abéu, sobre esti trabayu grabáu nos Tutu Estudios cola producción de Sergio Rodríguez. «Van poder sentise pieces más movíes y otres más sele, pero toes enfocaes al baille y respetando les sos estructures», añade Vega sobre esti discu nel qu’afirma que quixeron «esperimentar y arriesgar pero calteniendo siempre’l soníu que nos caracteriza»; un soníu que «dempués de varios intentos dende la creación del grupu y de tener la sensación de nun dar cola tecla«, hai un tiempu qu’algamó «la dirección que más representa a Abéu», añade.
En 2018 cuatro adolescentes de Xixón venceyaos al Grupu Folclóricu Trebeyu crearon Abéu, una formación de voz y percusión tradicional. Pasín a pasu, esti grupu foi dando conciertos, ensayando, andando a la gueta d’un soníu que-yos convenciera… medrando, a la fin. Y el 16 de mayu nel Teatru Auditoriu de Grau va poder vese enriba l’escenariu y sentise en CD y plataformes dixitales, el resultáu d’estos años de trabayu «tovía queda lo más duro, pero facémoslo felices y con munches ganes«, conclúi Paula Vega.
semeya de Nay Semeya.
Suscríbite a les nuestres novedaes
