K-MUDAR la memoria

Abéu amosaron munches hores de trabayu ya bones decisiones artístiques nel conciertu presentación del so primer discu

Cróniques

El pasáu 16 de mayu pudimos esfrutar de la presentación de K-MUDAR, el trabayu discográficu nuevu d’Abéu nel Teatru Auditoriu de Grau. L’eventu tuvo munchu de celebración colectiva de la música tradicional dende una mirada nueva, con delles collaboraciones de músicos ya músiques reconocíes en distintes escenes musicales asturianes, que dieron por resultáu una selección de pieces variaes que nun dexaron al públicu indiferente.

*El cuartetu tuvo acompañáu por dellos músicos a lo llargo’l conciertu*

Nesti trabayu, como dixo Oscar Vega nun momentu, el grupu Abéu pretende beber de la tradición de pandereta n’Asturies, pero calteniendo esi calter d’evolución propiu de la música tradicional, ya asina foi que lo adaptaron a sonoridaes más propies del siglu XXI.

«L’eventu tuvo munchu de celebración colectiva de la música tradicional dende una mirada nueva, con delles collaboraciones y una selección de pieces variaes que nun dexaron al públicu indiferente»

Al llegar al auditoriu, notábase un ambiente d’espectación, en parte gracies a la gran promoción que se fizo en redes de la presentación como “cita imprescindible”, y que fixo d’esti ún de los eventos esperaos del añu nel folk n’Asturies, amás del llargu camín que lleva percorríu‘l grupu dende 2018. Con una marca bien cuidada, allegaos del grupu preocupábanse por entregar a los que díbemos entrando una botella d’agua col logu de K-MUDAR, y una galletina qu’esfrutamos enantes d’entamar la música.

*La formación foi vistida col mesmu tonu, ensin dir uniformaos*

El tema col qu’abrieron la velada foi ‘Cumpañeira dil alma’, un cantar de siega que ficieron seliquín ya con segundes voces, a mou d’introducción pal restu del repertoriu más animáu. Foi notable’l cuidáu na estética, pues l’escenariu taba sutilmente decoráu con floriquines azules, el color escoyíu pa esta campaña, ya ellos mismos diben vistíos d’esti tonu, ensin tar uniformaos pero calteniendo la unidá, lo qu’ameyoró muncho la so presencia escénica.

«Ye destacable la importancia que tuvo’l baille esta nueche, na que la mayor parte les canciones fueron interpretaes tamién corporalmente por Ana Mier y Álvaro Morais, acompañaos n’otros momentos por Rellume, Trebeyu o la ovacionada Sara Rodríguez»

El primer momentu destacáu foi nel cuartu tema, ‘Lumbria’, nel que collaboraron les moces de Rellume, una formación similar más recién, qu’agora mesmo ta faciendo ferver los festivales asturianos. Pero la que prendió al públicu de verdá foi Sara Rodríguez, que salió a baillar la garrucha con Álvaro Morais ente aplausos y ovaciones. Ye destacable la importancia que tuvo’l baille esta nueche con Abéu, na que la mayor parte les canciones fueron interpretaes tamién corporalmente por Ana Mier y Álvaro Morais, acompañaos n’otros momentos por Rellume (nel pericote de ‘Santu Medé’, por exemplu) o Trebeyu.

*La veterana Sara Rodríguez bailló con Álvaro Morais, ganándose al públicu*

*Ana Mier y Álvaro Morais baillaron en munches de les pieces*

Lo que toos sacamos en claro ye que si dalgo foi bien escoyíu, foi la elección de los músicos qu’acompañaron a Abéu nel trescursu la nueche, que non yeren pocos. Entamando por Olaya Llucía al baxu y Andrés García a les guitarres, qu’amosaron muncha finura ya entendimientu al iguar los cantares, llegando incluso a atopase delles reminiscencies a Pink Floyd puntualmente. La flauta saltarina d’Adrián Argüelles, el meyor flautista d’Entós, fízose notar en dellos momentos allegrando col so timbre llimpiu y agudu.

Por otru llau, nel tema ‘Julia’, Daniel Sánchez ya Rubén Sánchez amosaron gran gustu ya destreza colos sos instrumentos -caxón flamencu ya saxu respectivamente- convirtiéndose nun de los momentos más destacaos de la nueche. Por últimu, l’apaición estelar de Javier Menéndez al bouzouki nel últimu tema, nel que tamién andecharon los músicos ya músiques del Grupu Folklóricu Trebeyu (Isa Rodríguez al vigulín, Diego Fernández a la flauta ya Gonzalo Villa al contrabaxu). A esti cantar púnxo-y la guinda la Banda de Gaites de Villaviciosa “El Gaiteru”, xunto a los demás componentes de Trebeyu ya Rellume danzando al fondu, faciendo esta multitú una imaxe ablucante p’acabar por tolo alto la presentación.

*María Blanco, Paula Vega, Oscar Vega y Edu Llosa festexando l’éxitu del conciertu*

Quédame por falar de les protagonistes de la nueche, María Blanco, Paula Vega, Edu Llosa y Óscar Vega, o Abéu, qu’amosaron munches hores de trabayu ya bones decisiones artístiques. Especial mención a les panderetes, que tán feches pol propiu Edu Llosa, ya que complementaes cola bona sonorización d’Eva Morán dieron-y muncha claridá a la música, ensin arrenunciar a los graves que toos esfrutamos.

*L’ambiente foi de celebración y compañerismu ente toles persones implicaes*

Más allá del conciertu, la presentación marca l’aniciu d’un branu pol que naguamos que tea enllenu de música, baille ya cultura. Queda nel aire la sensación de qu’esto nun foi más que l’entamu.

Semeyes cedíes a musicasturiana.com por Leticia Cernuda y Abéu.