El sábadu 8 de febreru de 2025 en Lata de Zinc (Uviéu) va celebrase’l III Semando Fest, festival de música moza n’asturianu qu’entama Musicasturiana.com y Ixuxú Cultura. Nél van participar cuatro proyectos d’estremaos estilos musicales cola característica en común de que la mayoría de los sos componentes son menores de 35 años. La primera confirmación ye la d‘Abéu, que van ufrir un conciertu folk protagonizáu pol papel de la percusión.
El so repertoriu ta formáu por cantares tradicionales, na so mayoría asturianos, col oxetivu de romper col so enfoque, ufriendo una visión diferente y afecha al contestu musical actual. Abéu son les voces y percusión de María Blanco, Celia Corrales, Óscar Vega y Paula Vega, acompañaes pola guitarra d’Edu Llosa. La gran mayoría de los temes respeten la estructura tradicional, convidando a andechar colos sos ritmos nel baille. La motivación de los sos integrantes ye llevar la música tradicional a les xeneraciones d’anguaño, dotándola de modernidá.
Siguiente confirmación
Con un diseñu fechu pola diseñadora xixonesa Paula Suárez «Surimi» -autora de tola identidá visual d’esti III Semando Fest-, anúnciase esta primer confirmación, a la que van siguir les demás nes prósimes tres selmanes. Xuntes, van completar el cartelu d’una iniciativa que nagua por puxar pol relevu xeneracional na música asturiana; por ufrir un festival con un formatu orixinal qu’entemeza aspectos d’una gala colos d’un conciertu al usu; que reivindica les sales de conciertos como un espaciu afayadizu pal exposigue de la música de raigañu; y qu’apuesta por da-y oportunidaes a les y los creadores xóvenes.
Suscríbite a les nuestres novedaes
