La Conseyería de Cultura, Política Llingüística y Deporte celebra los díes 22, 23 y 24 de payares la tercer edición del Xuntoiro, l’alcuentru que tien como oxetivu favorecer l’intercambéu de les industries culturales qu’utilicen l’eonaviegu. Si n’ocasiones anteriores les actividaes se celebraron n’A Veiga y El Franco, anguaño ye’l conceyu de Santalla d’Ozcos el qu’acueye dafechu esta celebración de la llingua y la cultura de la parte más occidental d’Asturies.
La Casa de Cultura de Santalla va acoyer a les 21.30h del sábadu los conciertos de rock en gallego-asturianu de Bacotexo y Amarradizo, ún de los momentos musicales del eventu, que tamién va tener nesta edición conferencies, lliteratura, artes escéniques, espectáculos pa neños y neñes, mercáu popular, biblioteca ambulante, proyección d’audiovisuales o visites guiaes a equipamientos.
Toles actividaes son gratuites y tán dirixíes a tolos públicos, con protagonismu especial del infantil, al que se dedica específicamente la xornada mañanera del vienres 22. A partir d’esta fecha desenvuélvese un programa qu’incluye talleres, sesiones de cuntacuentos, la presentación de los últimos trabayos lliterarios editaos n’eonaviegu, representaciones teatrales, recitales poético-musicales y la yá mentada nueche del rock eonaviegu.
Tamién tán programaes otres acciones, como la proyección d’audiovisuales n’eonaviegu o visites guiaes a la Casa Natal del Marqués de Sargadelos y la ruta de les escultures de Santalla. Amás, va ponese en marcha a lo llargo de los trés díes una biblioteca ambulante eonaviega. El sector hosteleru tamién va formar parte del Xuntoiro, porque los chigres y restaurantes del conceyu van xuntase a la celebración repartiendo poemes, en formatu marcapáxines, a los sos veceros y veceres.
Suscríbite a les nuestres novedaes
