Abre’l plazu pa presentase al Premiu Obdulia Álvarez «La Busdonga» d’Asturianada

Yá hai más información del Premiu Obdulia Álvarez La Busdonga d’Asturianada que convoca la Conseyería de Cultura, Política Llingüística y Deporte, una reconocencia destinada a promover y difundir la canción asturiana, una de les manifestaciones culturales más significatives del país que se declaró Bien d’Interés Cultural de calter inmaterial nel 2015. Mañana abre’l plazu de presentación de solicitudes, que fina en diez díes naturales, esto ye, el 12 de payares. Amás. yá se conocen más detalles sobre los requisitos de les persones aspirantes al premiu. Tola información pue consultase na resolución del BOPA.

Según esta resolución, van poder presentase «cualesquier persona, ensin distinción de nacionalidá, que teniendo participao na categoría femenina, masculina o moza de dalgún de los concursos llocales d’asturianada “Ciudá de Llangréu” (VIII edición 2023), “Ciudad de Oviedo» (edición 2024), “Conceyu Siero” (XII edición 2024), “El Comercio” (XLI edición 2024), “Valle del Narcea” (VI edición 2024), “Valles d’Ayer” (III edición 2024) o “Villa de la Avellana” (edición 2024), quedaren seleccionaos o seleccionaes ente les seis persones meyor clasificaes de la so categoría en dalguno de los certámenes llocales y, tamién, nel conxuntu de los referíos certámenes llocales». Añade, amás, que «quien participe na categoría moza nun va poder facelo en nenguna de les otres dos».

El 29 de payares el Teatru de La Llaboral de Xixón va acoyer la gala final d’esti certame que va repartir 15.000 euros en tres categoríes: 6.000 euros pa la categoría femenina, 6.000 euros pa la masculina y 3.000 euros pa la de mocedá (menores de 22 años). Con esti premiu nuevu, la Conseyería busca reconocer y valorar «la tradición tan rica de l’asturianada y el llabor d’aquelles persones que caltienen viva esta forma d’arte», amás de «fomentar l’usu de la llingua asturiana, promoviendo la so normalización y espardimientu al traviés de la música». D’esta forma, el xuráu va evaluar el desempeñu de les persones cantantes teniendo en cuenta los criterios que s’especifiquen nes bases que se publicaron nel BOPA. Estos son la conducta y actitú escénica, la entonación y afinación, la calidá d’emisión y dicción vocal, la ornamentación y matización; la dificultá y variedá d’estilos y la calidá llingüística.