Esta mañana l’Antiguu Institutu de Xixón acoyó la rueda prensa de presentación de Xixón Fem Music, un programa de la Fundación Municipal de Cultura de Xixón que quier visibilizar la brecha de xéneru nel ámbitu de la música a nivel llocal, y desendolcar acciones p’ayudar a amenorgala. Una de les primeres va ser el semilleru de bandes pal que pueden apuntase muyeres de nivel amateur hasta’l día 31 d’esti mes y pa la qu’hasta’l momentu hai yá 27 muyeres apuntaes. Sicasí, nun va ser la única de les midíes a desendolcar, yá que tamién s’anunció un diagnósticu de la presencia de la muyer na industria musical xixonesa y asturiana.
«Xixón Fem Music nagua por llegar a ser una verdadera marca, que nos ayude a visibilizar el llabor musical de munches muyeres asturianes que la historia nun trató xustamente y qu’anguaño tienen que facer munchos esfuercios pa visibilizase», entamó plantegando na so intervención la conceyala de cultura de Xixón, Montserrat López Moro, alrodiu d’esta propuesta pionera «que quier desendolcar nel futuru munches más acciones que-y dean puxu al papel de les muyeres na música».
L’acción cola que s’entamó a presentar Xixón Fem Music foi la d’anunciar la creación d’un semilleru de bandes tutorizáu por Mar Álvarez (Pauline en la Playa, Petit Pop, Las Malvinas, Undershakers…); y Sil Fernández (Silvidos y Gemidos, Delagua, Los Commodoros, Hot Shot…). Esti xueves remata’l plazu p’apuntase y hasta’l momentu hai inscrites «11 vocalistes, 7 baxistes, 4 bateríes, 2 guitarres, 1 teclista y 2 arpistes d’ente 18 y 60 años», desplicó Pablo Gallo García, técnico de programes del departamentu d’Innovación Cultural de la FMECyUP. Con toles persones que s’apunten va facese una esbilla atendiendo a intereses, edaes y instrumentación pa formar dos grupos de música que van entamar a ensayar «a mediaos de payares» nel Antiguu Institutu y nos llocales d’ensayu Manuel Medina de Roces con un equipu facilitáu pol propiu Ayuntamientu.
Desigualdá na industria musical
«Cuando nos imaxinamos un grupu de música, imaxino que la mayoría de la xente -homes y muyeres- pensamos nuna imaxen formada sobre manera, por homes», ilustró Gallo pa poner de manifiestu la desigualdá qu’hai enriba los escenarios, pero tamién abaxo. D’esta manera tanto él como Mar Álvarez sorrayaron qu’hai mui poques técniques de soníu, responsables de festivales, directores de discográfiques, docentes de conservatorios… que seyan muyeres. Por eso, amás de la propuesta del semilleru, dende la FMECyUP tamién anunciaron que va facese un diagnósticu p’analizar toa esta cuestión a nivel llocal y asturianu y proponer más midíes p’avanzar hacia la igualdá na industria musical.
Otru exemplu de tolo que tovía hai que valtar díxolo bien claro Silvia Fernández: «tovía cuando toi tocando y acabo, dícenme -non unu ni dos ni tres ni cuatro- «perdona, que nun te paeza mal, pero ye que toques como un tío». O sea, que tocar bien ye tocar como un tío». D’esta miente, llamó a dir «eliminando de les mentes» estes visiones machistes y defendó Xixón Fem Music como una iniciativa pa «incentivar a toles muyeres que tovía nun s’atreven» a tocar en público.
Conciertu de presentación
Pa dar un pasu más na difusión del proyectu esti sábadu 2 de payares a las 21 hores nel Patiu del Centru de Cultura Antiguu Institutu va facese una jam session con una banda residente formada por Sil Fernández, Mar Álvarez, Cristina Montul y Eva Díaz a la que van unise otres músiques amateurs que van dir tocando un repertoriu musical protagonizáu por obres de muyeres del pop y el rock.
Precisamente les jam session van ser l’arranque del semilleru, que va tener una formación cola qu’abarcar una formación «qué hai que tener en mente pa echar a andar un grupu. Dientro del escenariu, fuera, tola xestión de les rellaciones, etc», como sorrayó Pablo Gallo. Amás, Mar Álvarez destacó qu’esta iniciativa tamién busca dir más allá de la interpretación y fomentar la creación si hai participantes que traigan les sos propies composiciones. Too ello, dientro d’un programa de seis meses que nagua por que les dos formaciones que surdan dientro d’él seyan estables y sirvan p’aumentar el númberu de grupos femeninos n’Asturies.
Suscríbite a les nuestres novedaes
