El sábadu pasáu PVXARRA dieron el so -ablucante- primer conciertu nel IV Semando Fest y aprovecharon la ocasión pa poner a la venta la so primer «maketa»: Raspiar. L’autoxestión, la creatividá, l’humor y la crítica social marquen l’espíritu d’esti CD que recueye diez temes y que pel momentu pue mercase namás nos conciertos del tríu sierense.
Raspiar reflexa orixinalidá nel formatu y nel conteníu. El CD vien dientro d’un papel de llixa qu’inclúi un llibretu-póster con dibuxos y testos críticos de calter poéticu. «Cada canciu nesta maketa ye d’un estilu diferente, puen buscase munchos nomes de xéneros: glitch, hyperpop, hardcore, petardeo, hiphop esperimental… pero pa nós ye PUXARRA», desplica’l grupu na publicación que fixeron en redes sociales p’anuncialo. Too ello ta acompañáu por unes lletres enllenes de denuncia y ironía.
La grabación fíxose ente’l branu y l’iviernu de 2025 ente Feleches, Pandiellu y Negales; inclúi los cuatro singles que PVXARRA foi llanzando desque anunciaron el so surdimientu esti agostu –‘TIESLO TOU (NUN QUIES NA)‘, ‘FURACU (COMIÓME)‘, ‘SOI (NUN SOI)‘ y ‘MARCHA (MARCHA)– xunto a una ‘Intro’ y otres cinco pieces tralleres con un soníu caseru, que por eso ye una «maqueta».
«Por mercar esta maketa ties descuentu nel nuesu primer discu, que saldrá d’equí a unos meses», pon nos créditos el llibretu de Raspiar, polo que la formación ta yá trabayando nel so primer trabayu profesional de llarga duración. D’esta manera, esti tríu que tien de referentes a grupos como Death Grips, IDLES, Kneecap, Chill Mafia o Aphex Twin y que ta formáu por Ferla Megía a la producción, Cosme a les lletres y voz y Argu al baxu continúa’l so prometedor camín
Suscríbite a les nuestres novedaes
