“Alcuentru Trad-Urbán” va rellacionar les músiques tradicionales d’Asturies y Galicia
“Una oportunidá p’amosar toles semeyances y estremances qu’hai ente les músiques tradicionales de tresmisión oral ente Galiza y Asturies con una perspectiva actual”, asina preséntase l’Alcuentru Trad-Urbán una xuntanza qu’entamen el 25 de marzu n’Uviéu Les Pites xunto a l’A.C Trépia de Pontevedra. D’esta manera, va haber a lo llargo’l día talleres, mesa redonda y conciertos de música gallega y asturiana. La entrada ye con inscripción online.
El programa arranca pela mañana con talleres de baille en Lata de Zinc y de pandereta nel local de Santi Galguera. Ente les 10h y les 14.30h van alternase dos talleres de baille asturianu, dos de baille gallegu, dos de pandereta asturiana y dos de pandereta gallega. Cada taller tien una hora de duración y repártese en dos niveles; iniciación y avanzáu. Pela tarde la programación va ser dafechu en Lata de Zinc y entama a les 18h cola mesa redonda Xeres nel baille tradicional d’anguañu na que participen Llorián García Flórez, Gabi Reboredo y Branca Albán, con moderación de Mariuka de Les Pites.
El ramu van ponelu los conciertos de música de raigañu asturiana y gallega. D’esta manera, van tocar les asturianes Abéu a les 21h, los gallegos Maghúa (22h) y Toma de Terra (23h), pa llueu rematar la xornada la DJ Fañagüeta. Una bona iniciativa pa interrellacionar y conocer más de cerca la realidá de la música y baille de tresmisión oral d’estos dos países del arcu atlánticu.
