Misiva publica’l videoclip de “La Cárcel”

El pasáu mes d’avientu la banda punk-rock Misiva publicó’l so trabayu nuevu, l’EP Mala Relixón. El sábadu 25 de marzu van presentalu en directo na Sala Gong d’Uviéu, nun conciertu nel que van tar acompañaos del grupu punk Ochobre. Pa calentar motores, la formación moscona estrena’l videoclip de “La Cárcel”, cantar col que zarren l’EP.

«El videu fala de la condena na que tamos cualquiera de nós, de como vamos prendiendo la máquina d’odiar hasta que nos decatamos de que tamos viviendo una sinrazón de la que nun somos a fuxir», comenta’l grupu nes sos redes sociales sobre esta obra audiovisual creada por Titi Muñoz, como ye vezu nos videos de Misiva. Precisamente l’anterior videoclip d’esti EP nuevu,”Mar Adientro“, yá lo ficiera esti prestixosu realizador.

Nesta séptima grabación d’estudiu que supón Mala Relixón, la banda moscona ruempe cola llínia d’escuridá y rabia de los sos primeros discos, pa presentar un soníu más averáu al del cenciellu “La Misiva“, publicáu en marzu de 2022. Los cuatro cantares dan-y dan una vuelta de tuerca al estilu, a la temática y a la música que lleven faciendo dende va más de 12 años. «Son cuatro cañonazos enllenos d’enerxía, de riffs mui curiaos y de voces sorprendentes; con unes lletres que son un glayíu d’esperanza y una invitación a mirar pa dientro, que ye onde tán al final toles respuestes», comenta’l grupu.

25 de marzu en directo

Les entraes entraes anticipaes yá tán a la venta online por 10 euros pa la cita col punk n’asturianu que va haber el 25 de marzu, a les 20.30h, na sala Gong d’Uviéu. Misiva va presentar Mala Relixón xunto a Ochobre, una de les bandes moces que ta garrando’l relevu nel rock astur de grupos míticos como Dixebra, Skama la Rede o Skontra.

Mercar discos de Misiva na tienda online