La Tarrancha publiquen el videoclip de “Tiempu de sidra y roses”
La Tarrancha ta acabantes d’asoleyar el videoclip del cantar “Tiempu de sidra y roses”. El videu, grabáu y editáu por CreyFilms & Blue Cyclop, ta realizáu a partir de les imaxes del conciertu especial “Camín de VENTI”, que la banda dio nel Teatru Vital Aza, de L.lena el pasáu més de payares. El conciertu, que cuntó con delles collaboraciones musicales, foi grabáu n’audiu y videu pa poder espardelu depués dientro de los actos de celebración del 20 aniversariu del grupu.
“Tiempu de sidra y roses”, ye un single publicáu en 2022 por La Tarrancha. Sigue’l camín de la fusión del so autodenomináu mecigayu ska, nesti casu, entemeciendo soníos punk con aires folk d’equí y de allá, o de nenyures.
Amás la banda, acaba de recibir dientro el Premiu AMAS na Categoría de Meyor Directu. Esta reconocencia a los sos directos, llega xusto cuando faen 20 años na carretera y nos escenarios, desque en 2003 fixeren la so primer grabación d’estudiu. Ye por eso que la xira del 2023 lleva’l nome de VENTI. Amás d’esta xira, VENTI va ser sinónimu del llanzamientu de distintos trabayos espaciaos a lo llargo l’añu. Ente ellos, ta la publicación de dalgunos videos del directu Camín de VENTI, la publicación en plataformes dixitales de parte del conciertu en formatu d’álbum y la grabación de nuevos singles.
