Esti xueves 22 de mayu a les 19h la Biblioteca Pública Xovellanos de Xixón entama l’actu Háblame de Música nel qu’Alicia Álvarez (Pauline en la Playa, La Fabriquina…) va falar d’asturianes na música. Nél, la música y periodista va inspirase nel llibru de la so autoría, Asturianes, pa falar de la figura de la muyer na escena musical d’Asturies.
«Faigo un análisis de lo que ye la presencia de la muyer dientro de los xéneros estremaos y tócolos toos: clásica, urban, jazz pop, indie, música tradicional, canción asturiana, folk, rock and roll…», desplica Álvarez. Tamién va falar de «cómo cambió nos últimos 30 o 40 años el papel qu’ocupa la muyer dientro de la música» y va sorrayar «lo importatísimos que son los referentes llocales pa qu’esa tresformación pueda dase».
Figures como Herbamora, Leticia Baselgas, Marisa Valle Roso o Silvia Quesada van tar presentes nesta charra que complementa a Asturianes, llibru que percuerre la figura de venti muyeres y colectivos inspiradores d’Asturies. Ente estes figures, tres pertenecen a la escena musical: Obdulia Álvarez La Busdonga, primer muyer que grabó discos de canción asturiana; el colectivu de música tradicional Muyeres, que reivindica’l papel de la muyer como protagonista y depositaria de la tradición musical asturiana; y Undershakers y Nosoträsh, los dos primeros grupos de música femeninos dafechu n’Asturies -y cásique tamién na escena indie de tol Estáu español.
Suscríbite a les nuestres novedaes
