El domingu 4 de mayu entamó’l XIII Concursu de Canción Asturiana Conceyu de Siero, ún de los eventos institucionales más veteranos dedicaos a l’asturianada. Esti certame entamáu pol Ayuntamientu Siero, la so Fundación Municipal de Cultura y AFATRA (Asociación de Folclore Amigos de la Tradición) celébrase hasta’l 29 de xunu y esti sábadu 24 ye a les 17.30h nel CPI Llugones la cuarta xornada clasificatoria, na qu’amás va homenaxease a Esther Peinó «memoria viva de la tradición d’Asturies».
Nesta xornada van participar un total de nueve persones: Rubén Barredo Sánchez (Villaviciosa), María del Carmen Fernández Álvarez (Cangas del Narcea), José Manuel González Granda (Llangréu), María Latores (Uviéu), Valentín García Fernández (Grau), Manuel Roza Llera (Colunga), María Luisa Martínez Suárez (Xixón) -que tamién intervién na modalidá de canción vaqueira-, Carlos Velasco Montes (Bimenes) y Lorena Corripio López (Colunga).
Pa esta edición inscribiéronse 42 persones dividíes en 27 na categoría absoluta masculina, 8 na femenina y 7 na de mocedá. Hai siete premios nes categoríes absolutes y premios nes modalidaes de canción, ayerana, vaqueira (memorial Graciano Gutiérrez “Radio Pola”) y canción dialogada (memorial Agustín Argüelles y Diamantina Rodríguez). La categoría moza ye amuesa -lleven toos el mesmu troféu, diploma y regalos- pero puntuable pal II Premiu Obdulia Álvarez ‘La Busdonga’ d’Asturianada.El 13 de xunetu va ser la gala de premios.
Esta xornada va ser un homenaxe a Esther Peinó muyer que percorrió mercaos tradicionales interpretando coples. «Al travies de les sos coples y el so trabayu pedagóxicu, podemos facer un estudiu fondu de la herencia de la tradición asturiana, de los vezos y les costumes, de sestaferies, filandones, de los oficios, de la xera del campu, del llar y del cortexu…», destaquen dende la organización del eventu que va distinguila «por tola so contribución al caltenimientu del nuesu patrimoniu cultural«.
Suscríbite a les nuestres novedaes
