Alicia Álvarez publica ‘Asturianes’, una obra sobre venti muyeres na qu’hai protagonismu de la música
Yá ta a la venta Asturianes, la obra nueva d’Alicia Álvarez con ilustraciones de María Ortiz que percuerre la figura de venti muyeres y colectivos inspiradores d’Asturies. Aida Lafuente, Margarita Salas, Les Cigarreres, María Luisa García, Urraca l’Asturiana, Jocaca Bobela y Marica Andallón o Xosefa Xovellanos son dalgunos de los nomes presentes nesti llibru qu’axunta muyeres de toles dómines de la historia’l país y de milenta perfiles: revolucionaries, escritores, científiques, deportistes, pintores, trabayadores, cocineres, polítiques y por supuesto, músiques.
D’ente les venti muyeres y colectivos, tres pertenecen a la escena musical: Obdulia Álvarez La Busdonga, primer muyer que grabó discos de canción asturiana; el colectivu de música tradicional Muyeres, que reivindica’l papel de la muyer como protagonista y depositaria de la tradición musical asturiana; y Undershakers y Nosoträsh, los dos primeros grupos de música femeninos dafechu n’Asturies -y cásique tamién na escena indie de tol Estáu español-.
«Cuando quixi amestar a la llibrería cuentos pa los mios fíos sobre eses biografíes femenines dime cuenta de que los nomes siempre se repetíen. Amelia Earhart, Frida Kahlo, Marie Curie… Los mesmos referentes femeninos pa tol planeta. La globalización faciendo de les suyes, desaniciando la identidá, lo diverso, lo local. Y claro, ensin tener referentes nel nuestru entornu cercanu, la llucha pola igualdá semeyaba un rellatu únicu qu’en tolos llaos asocedió igual o que, a lo menos, asocedió mui lloñe d’au vivimos. Y yo dende pequeña vivo en Xixón, Asturies. Asina que d’esti pensamientu nació esti llibru». Con estes palabres la música Alicia Álvarez (Undershakers, Pauline en la Playa), escritora (Pulgarina, ¿Qué te fai falta pa ser un héroe?, Kikirikikí), periodista y editora (La Fabriquina), presenta esti volume que tien les ilustraciones de la carbayona María Ortiz.
Una obra didáctica, cuidada y pa tolos públicos. Un llibru imprescindible porque fai xusticia dando respuesta a una doble invisibilización: a la de conocer la historia d’Asturies y a la de conocer la figura de muyeres que foron pegoyos pa esti país.
